अकोला,दि.०८ जिल्ह्यात पूर व अतिवृष्टीमुळे नुकसान झालेल्या घरांचे पंचनामे पूर्ण झाले असून सानुग्रह अनुदान वितरण बऱ्यापैकी झाले असले तरी ज्यांच्या घरकुलांचे नुकसान झाले आहे ती घरे विविध घरकुल योजनांच्या माध्यमातून पुन्हा उभारता यावे यासाठी मदतीचा प्रस्ताव लवकर तयार करावा,असे निर्देश राज्याचे जलसंपदा व लाभ क्षेत्रविकास, शालेय शिक्षण, महिला व बालविकास इतर मागासवर्ग, सामाजिक व शैक्षणिक मागास प्रवर्ग, विमुक्त जाती, भटक्या जमाती आणि विशेष मागासप्रवर्ग कल्याण, कामगार राज्यमंत्री तथा अकोला जिल्ह्याचे पालकमंत्री ना.ओमप्रकाश उर्फ बच्चू कडू यांनी आज येथे दिले. यावेळी त्यांनी ज्यांचे घर, शेती, जिवितहानी तसेच पशुधनाची हानी असे अनेक प्रकारे नुकसान झाले आहे, अशा बाधितांची वेगळी नोंद करावी, तसेच जिल्ह्यात पूरव्यवस्थापनाचा आराखडा तयार करावा,असेही निर्देश त्यांनी यावेळी दिले.
जिल्ह्यात अतिवृष्टी व पूरस्थितीमुळे झालेले नुकसान व त्यानंतरचे मदत व बचाव कार्य याबाबतचा आढावा आज ना. कडू यांच्या अध्यक्षतेखाली घेण्यात आला. यावेळी विधान परिषद सदस्य आ. अमोल मिटकरी, विधानसभा सदस्य आ. नितीन देशमुख, जिल्हाधिकारी निमा अरोरा, जिल्हा परिषदेचे अतिरिक्त मुख्य कार्यकारी अधिकारी डॉ. सुभाष पवार, निवासी उपजिल्हाधिकारी संजय खडसे, पाटबंधारे, सार्वजनिक बांधकाम, कृषी विभागाचे अधिकारी तसेच सर्व तहसिलदार, उपविभागीय अधिकारी, गटविकास अधिकारी उपस्थित होते.
[metaslider id=113]
