चंद्रपूर, दि. २० : टू व्हिलर चालवताय…. हेल्मेट घाला, फोर व्हिलर चालवताय…..सीटबेल्ट लावा, दारू पिऊन वाहन चालवू नका, अतिवेगाने पळवू नका…..असा तगादा पाल्यांनी त्यांच्या पालकांसमोर लावावा. रस्त्यावर वाहन चालवितांना मुलांचा हा हट्टच पालकांसाठी ‘ब्रेक’ चे काम करेल आणि त्यामुळे अपघातांची संख्या कमी होण्यास नक्कीच मदत होईल, अशी अपेक्षा जिल्हा पोलिस अधिक्षक रवींद्रसिंह परदेसी यांनी मुलांकडून व्यक्त केली.
उप-प्रादेशिक परिवहन कार्यालयात ३४ वा रस्ता सुरक्षा सप्ताहाचा समारोप करतांना प्रमुख अतिथी म्हणून ते बोलत होते. यावेळी मंचावर अपर जिल्हाधिकारी श्रीकांत देशपांडे, वरिष्ठ न्यायाधीश तथा जिल्हा विधीसेवा प्राधिकरणचे सचिव सुमीत जोशी, जिल्हा माहिती अधिकारी राजेश येसनकर, उप-प्रादेशिक परिवहन अधिकारी किरण मोरे उपस्थित होते.
शालेय विद्यार्थ्यांनी आपल्या पालकांना आणि नातेवाईकांनासुध्दा वाहतुकीच्या नियमांचे पालन करायला लावावे, असे सांगून पोलिस अधिक्षक श्री. परदेसी म्हणाले, दुचाकीवर हेल्मेट, चारचाकी चालवितांना समोर असलेल्यांनी सिटबेल्ट लावणे अनिवार्य आहे. तसेच वाहन चालवितांना वेगावर नियंत्रण ठेवावे. दारू पिऊन किंवा वाहन चालवितांना मोबाईलचा वापर करू नये. पोलिस विभाग किंवा उप-प्रादेशिक विभाग हा दंड ठोठावण्यासाठी नाही तर नियमांचे पालन करून घेण्यासाठी रस्त्यावर उभा असतो. नियमांचे पालन करून कुटुंब वाचावे, हा मुख्य उद्देश आहे.
त्यासाठी शाळा आणि महाविद्यालयातील विद्यार्थ्यांमध्ये जनजागृती करणे आणि त्यांच्या माध्यमातून पालकांपर्यंत संदेश पोहचविणे याकरीता वर्षभर ही मोहीम राबविण्यात येईल. गत पाच वर्षी जिल्ह्यात ३१ डिसेंबरला अपघाताची श्रृंखला राहिली आहे. मात्र ३१ डिसेंबर २०२२ हा दिवस जिल्ह्यात अपघातमुक्त ठरला. जनजागृतीचा हा परिणाम आहे, असेही त्यांनी सांगितले. यावेळी त्यांनी पथनाट्य सादर करणा-या मुलांचे कौतुक केले.
