पुणे, दि. १८ : राज्यपाल भगत सिंह कोश्यारी यांनी किवळे, पुणे येथील सिंबायोसिस कौशल्य आणि व्यावसायिक शिक्षण विद्यापीठाला भेट दिली आणि विभाग प्रमुख व शिक्षकांशी संवाद साधला.
कौशल्य शिक्षण ही काळाची गरज असून युवकांना रोजगारक्षम, स्वयं-रोजगार निर्माते, व उद्यमशील बनविण्यासाठी राज्यातील पहिले कौशल्य विद्यापीठ असलेले सिंबायोसिस कौशल्य व व्यावसायिक शिक्षण विद्यापीठ अतिशय चांगले कार्य करीत असल्याचे राज्यपालांनी यावेळी सांगितले. विद्यापीठाचे ध्येय्य प्राप्त करण्यासाठी सर्व अध्यापक मंडळींनी एकदिलाने योगदान दिले पाहिजे असे राज्यपालांनी सांगितले.
