नाशिक, दि :२१ कोरोना अद्याप संपलेला नाही. जगभरात अनेक देशांमध्ये लॉकडाऊन सुरू आहे. कोरोना काळात आपल्या देशातील तसेच राज्यातील प्रत्येक व्यक्तीचा जीव आपल्याला महत्त्वाचा आहे, त्यामुळे सर्वांनी आपआपली जबाबदारी पार पाडणे आवश्यक असल्याचे प्रतिपादन राज्याचे अन्न, नागरी पुरवठा व ग्राहक संरक्षण मंत्री तथा नाशिक जिल्हा पालकमंत्री छगन भुजबळ यांनी केले आहे.
पालकमंत्री छगन भुजबळ यांच्या हस्ते आज येवला शहरात ४ कोटी १ लाख विविध विकास कामांचे लोकार्पण व भूमिपूजन पार पडले. त्यावेळी श्री. भुजबळ बोलत होते. यावेळी नगराध्यक्ष बंडू क्षीरसागर, उपनगराध्यक्ष सुरज पटणी, पंचायत समिती सदस्य मोहन शेलार, येवला बाजार समितीचे प्रशासक सभापती वसंत पवार, नगरसेवक दीपक लोणारी, प्रवीण बनकर, राजश्री पहेलवान, प्रांत अधिकारी सोपान कासार, बांधकाम सभापती शेख निसार अह. सगीर अह, कार्यकारी अभियंता प्रशांत सोनार, उपअभियंता उमेश पाटील यांच्यासह अधिकारी व पदाधिकारी उपस्थित होते.
यावेळी पालकमंत्री छगन भुजबळ म्हणाले की, कोरोनाच्या कालावधीतही आपण विकासाची कामे सुरू ठेवली आहेत. अनेक विकासाची कामे आपल्याला मार्गी लावायची आहे. जी विकास कामे सुरू करण्यात आलेली आहे ती तातडीने पूर्ण करण्यासाठी शासन सर्वोतोपरीने मदत करीत आहे. त्या अनुषंगाने शासनाचा प्रतिनिधी म्हणून नागरिकांचे प्रश्न सोडविल्याशिवाय मी स्वस्थ बसणार नाही. त्याचबरोबर शहर स्वच्छ ठेवणे जेवढी नगरपालिकेची जबाबदारी आहे. तितकीच जबाबदारी नागरिकांची आहे. म्हणून प्रत्येक नागरिकाने आपला परिसर स्वच्छ ठेवण्यास प्राधान्य द्यावे असे आवाहन पालकमंत्री छगन भुजबळ यांनी यावेळी केले आहे.
