देगलूर तालुक्यात स्मार्ट मीटर विरोधात शिवसेनेचे निवेदन

देगलूर तालुक्यात स्मार्ट मीटर विरोधात शिवसेनेचे निवेदन

देगलूर (ता. ९ सप्टेंबर) – देगलूर शहर व तालुक्यातील ग्रामीण भागात महावितरण कंपनीकडून बसविण्यात येणाऱ्या स्मार्ट मीटरविरोधात शिवसेनेतर्फे जोरदार आंदोलन करण्यात आले. दुपारी १२ वाजता महावितरण कार्यालयात उपमुख्य कार्यकारी अभियंता श्री. चाटे यांना निवेदन देण्यात आले.

निवेदनात मागील चार महिन्यांपासून हजारो ग्राहकांचे मीटर जम्पिंग होऊन अत्याधिक वीजबिले आकारली जात असल्याची तक्रार करण्यात आली. दुरुस्तीच्या नावाखाली दररोज ४० ते ५० स्मार्ट मीटर बसविण्यात येत असल्यामुळे नागरिकांत संतापाची लाट आहे. शहरात व तालुक्यात हे मीटर बसवू नयेत, अशी मागणी शिवसेनेने केली.

पंधरा दिवसांतही स्मार्ट मीटर बसविण्याची प्रक्रिया सुरूच ठेवली तर उपजिल्हाधिकारी कार्यालयासमोर आमरण उपोषण, रास्ता रोको आणि “स्मार्ट मीटर फोडा आंदोलन” करण्यात येईल, असा इशारा शिवसेनेने दिला.

या आंदोलनात उपजिल्हाप्रमुख महेश पाटील, शहरप्रमुख संजय जोशी, शहरप्रमुख रवि उल्लेवार, युवा नेते व युवासेना तालुका प्रमुख भागवत पाटील सोमुरकर, उपशहरप्रमुख मष्णाजी पैलावार, बाबुराव मिनकीकर, युवासेना पदाधिकारी विनोद सोनकांबळे, शहर समन्वयक संतोष कांबळे, भ्रष्टाचार निर्मूलन समिती अध्यक्ष नागेश गुडलावार, उपतालुकाप्रमुख

मानाजी पाटील, शिवाजी सोनकांबळे मुजळगेकर आदींसह शेकडो पदाधिकारी, शिवसैनिक व नागरिक मोठ्या संख्येने उपस्थित होते. यावेळी प्रचंड घोषणा देत निदर्शने करण्यात आली.