बनावट नोटा देऊन फसवणूक; पोलिसांचा आरोपी शोध सुरू.

देगलूर प्रतिनिधी दि.२२ :- शेतकऱ्यांचा सरळसोट स्वभाव व विश्वासाचा गैरफायदा घेत काही समाजकंटक बनावट नोटांच्या साहाय्याने फसवणूक करत असल्याचा प्रकार उघडकीस आला आहे. देगलूर येथील आठवडी बाजारात बकऱ्याची खरेदी करताना एका वृद्ध शेतकऱ्यास तब्बल १६ हजार ५०० रुपयांच्या खोट्या नोटा देऊन फसवणूक करण्यात आली.

लालू किशन जाधव (वय ६०, रा. कुंचेली तांडा)ता.नायगाव हे शेतकरी आपल्या बकऱ्यांची विक्री करण्यासाठी शनिवारी सकाळी बाजारात आले होते. त्यावेळी एक अज्ञात व्यक्ती (वय ३५) या व्यक्तीने १६ हजार ५०० रुपयांना बकरा खरेदी करत ५००, २०० व १०० रुपयांच्या नोटा दिल्या. मात्र व्यवहारानंतर लगेचच त्या नोटा खोट्या असल्याचे लक्षात आले. उपस्थित नागरिकांनीही या नोटा बनावट असल्याचे सांगितले.

या घटनेची माहिती मिळताच पोलिसांत गुन्हा दाखल करण्यात आला असून, आरोपीचा शोध सुरू आहे.

नागरिकांना इशारा :

अशा प्रकारे शेतकरी व सर्वसामान्य नागरिकांना बनावट नोटांच्या सापळ्यात ओढले जात असल्याने प्रत्येकाने सावध राहणे अत्यंत गरजेचे आहे. पुढील काळ सण व उत्सवाचा असून दसरा व दिवाळी मध्ये प्रचंड प्रमाणे मध्ये व्यवहार खरेदी विक्री होत असते यावेळी प्रत्येक व्यवहारांमध्ये नागरिकांनी जपून व्यवहार केला पाहिजे व आपली फसवणूक होण्यापासून सावध राहिले पाहिजे कोणतीही मोठी रक्कम स्वीकारताना नोटांची नीट तपासणी केली पाहिजे.

या अश्या प्रकारच्या घटनांना आळा बसावा यासाठी पोलिस प्रशासनाने तत्काळ आरोपीला अटक करून बनावट नोटांच्या रॅकेटचा छडा लावावा, अशी देखील सर्वसामान्य नागरिकांकडून मागणी होत आहे.