कासार शिरसी येथून दोन माघवारी पायी दिंड्यांचे पंढरपूरकडे प्रस्थान; विठ्ठल नामाच्या जयघोषाने परिसर दुमदुमला.

कासार शिरसी येथून दोन माघवारी पायी दिंड्यांचे पंढरपूरकडे प्रस्थान; विठ्ठल नामाच्या जयघोषाने परिसर दुमदुमला

कासार शिरसी प्रतिनिधी,दि.२०:- कासार शिरसी येथून माघवारीनिमित्त निघणाऱ्या दोन पायी दिंड्यांचे पंढरपूरकडे मंगळवार, दिनांक २० रोजी मोठ्या भक्तिभावात प्रस्थान झाले. मृदुंगाच्या गजरात आणि विठ्ठल नामाच्या जयघोषाने संपूर्ण परिसर भक्तिमय झाला होता.

कासार शिरसी येथील माघवारी पायी दिंडी (वाडा) तसेच श्री विठ्ठल–रुक्मिणी परिवार सार्वजनिक माघवारी पायी दिंडी (बडूर, हासोरी, हालसीवाडी, हालशी हत्तरगा ते पंढरपूर) या दोन दिंड्यांचे प्रस्थान शहरातील मठाचे मठाधिपती गुरुमुर्गेंद्र स्वामी यांच्या प्रमुख उपस्थितीत झाले.

या निमित्ताने शहरातील प्रमुख मार्गांची “संतांचे मार्ग” या भावनेतून स्वच्छता करण्यात आली असून सडासमार्जन व आकर्षक रांगोळ्यांनी दिंडी मार्ग सुशोभित करण्यात आला होता.

प्रतिवर्षाप्रमाणे कासार शिरसी येथील माघवारी दिंडीचे विणेकरी बुद्धिवंत बिराजदार व नागनाथ स्वामी हे असून, श्री विठ्ठल–रुक्मिणी परिवार दिंडीचे विणेकरी हरिभक्त परायण ज्ञानेश्वर महाराज हासुरीकर यांच्या अधिपत्याखाली दिंड्यांचे प्रस्थान श्री विठ्ठल–रुक्मिणी मंदिरातून झाले. या वेळी गुरुमुर्गेंद्र स्वामी यांनी वारकऱ्यांना शुभेच्छा देत निरोप दिला.

या दिंडीत परिसरातील १५०० पेक्षा अधिक भाविकांनी सहभाग नोंदवला असून महिलांचा सहभाग लक्षणीय असल्याचे दिसून आले. डोंगरगाव, हत्तरगा, हलशी, कुन्हाळी हत्तरगा, मुळज, कदमापूर, बडूर, नेलवाड, औंढा सायखान, चिंचोली, हंद्राळ, कोराळी, कोरळवाडी, शिरशी वाडी, रामलिंग, मुदगड, मुदगवाडी, भगतवाडी, जाजन, मुगळी, हरीजवळगा, भूत मुगळी आदी गावांतील वारकरी या दिंडीत सहभागी झाले आहेत.

मंगळवार, दिनांक २० रोजी निघालेल्या या दिंड्या बुधवार, दिनांक २८ जानेवारी रोजी उमरगा–जळकोट–नळदुर्ग–सोलापूर मार्गे पंढरपूर येथे पोहोचणार आहेत. या दिंडी यशस्वीतेसाठी हरिभक्त परायण बसवराज काजारे, महावीर पाटील, दामू बंडगर, सुभाष यमदे यांच्यासह मधुकर किवडे, मोहन धायगुडे व अनिल जानकर हे विशेष परिश्रम घेत आहेत.