नांदेड प्रतिनिधी दि.२८ :- प्रजासत्ताक दिन हा केवळ राष्ट्रध्वज फडकविण्याचा सोहळा नसून, संविधानातील मूल्ये प्रत्यक्ष कृतीत उतरविण्याचा पवित्र दिवस आहे. हाच संदेश प्रत्यक्षात साकार करत धर्मभूषण ॲड. दिलीप ठाकूर यांच्या हस्ते लहुजी साळवे निराधार-निराश्रित बालकाश्रम, धनगरवाडी रोड, वाडी पाटी, नांदेड येथे ध्वजारोहण करण्यात आले.
तिरंगा अभिमानाने आकाशात फडकत असतानाच, त्यांनी अनाथाश्रमातील प्रत्येक मुलाच्या खांद्यावर प्रेमाची व सुरक्षिततेची ऊब ठेवत ब्लँकेटचे वाटप केले. थंडीने कुडकुडणाऱ्या हातात ब्लँकेट देताना त्यांच्या डोळ्यांत मायेचा ओलावा होता, तर मुलांच्या चेहऱ्यावर समाधानाचे हास्य उमटले. त्या क्षणी प्रजासत्ताक दिनाचा खरा अर्थ उपस्थितांना अनुभवता आला.
