नांदेडमध्ये २०० खाटांचे सुपर मल्टीस्पेशालिटी हॉस्पिटल उभारणीला केंद्रीय मंजुरी.

नांदेड प्रतिनिधी दि.०९:- नांदेड जिल्ह्याच्या आरोग्य सुविधांसाठी मोठी दिलासादायक बातमी समोर आली असून, शहरात २०० खाटांचे स्वतंत्र सुपर मल्टीस्पेशालिटी हॉस्पिटल उभारण्याच्या प्रस्तावाला केंद्रीय आरोग्यमंत्री जे. पी. नड्डा यांनी शिक्कामोर्तब केले आहे. तसेच भविष्यात एम्स उभारणीसंदर्भात सविस्तर अहवाल सादर करण्याच्या सूचनाही त्यांनी दिल्या आहेत.

या प्रकल्पासाठी खासदार डॉ. अजित गोपछडे यांनी सातत्याने पाठपुरावा केला होता. त्यांनी आज नवी दिल्ली येथे केंद्रीय आरोग्यमंत्री जे. पी. नड्डा यांची भेट घेऊन निवेदन सादर केले. यावेळी खासदार डॉ. अनिल बोंडे देखील उपस्थित होते.

डॉ. गोपछडे यांनी यापूर्वी २९ डिसेंबर २०२४, २७ जानेवारी आणि १० फेब्रुवारी २०२५ रोजी वारंवार पाठपुरावा करून हा प्रश्न मंत्रालयासमोर मांडला होता. त्यांच्या प्रयत्नांना अखेर यश आले आहे.

डॉ. शंकरराव चव्हाण शासकीय वैद्यकीय महाविद्यालयाकडे ११५ एकर जागा उपलब्ध असून, या ठिकाणी अत्याधुनिक सुविधा असलेले रुग्णालय उभारण्यात येणार आहे. येथे

कार्डिओलॉजी (हृदयरोग)

न्यूरोलॉजी (मेंदूविकार)

नेफ्रोलॉजी (मूत्रपिंड विकार)

कर्करोग उपचार

ट्रॉमा केअर

यांसारख्या गंभीर आजारांवर विशेष उपचार उपलब्ध होणार आहेत.

या नव्या रुग्णालयामुळे विद्यमान शासकीय रुग्णालयांवरील ताण कमी होणार असून, नांदेडसह लगतच्या जिल्ह्यांतील आणि सीमावर्ती भागातील रुग्णांना दर्जेदार व तातडीची आरोग्यसेवा मिळणार आहे. त्यामुळे संपूर्ण मराठवाडा आणि तेलंगणा सीमेवरील नागरिकांसाठी हा प्रकल्प वरदान ठरणार आहे.