नांदेड प्रतिनिधी :- सामाजिक न्याय, समता आणि भारतीय संविधानातील मानवतावादी मूल्यांच्या जपणुकीची प्रेरणा जपत दैनिक “वीर शिरोमणी” आणि “नंदगिरीचा कानोसा” या वृत्तपत्र परिवारातर्फे यंदाही “मूकनायक नॅशनल अवॉर्ड-२०२६” या राष्ट्रीय सन्मान सोहळ्याचे आयोजन करण्यात येणार आहे.
हा भव्य सोहळा दि. १८ मे २०२६ रोजी नांदेड येथे पार पडणार आहे. समाजातील वंचित, शोषित आणि उपेक्षित घटकांचा आवाज बुलंद करण्याची परंपरा जपत सामाजिक परिवर्तनाची ज्योत प्रज्वलित ठेवणाऱ्या व्यक्ती व संस्थांचा गौरव करण्यासाठी हा पुरस्कार दिला जातो.
“मूकनायक” ही संकल्पना डॉ. बाबासाहेब आंबेडकर यांच्या १९२० साली सुरू झालेल्या ऐतिहासिक चळवळीशी निगडित असून सामाजिक जागृती, शिक्षण, समता आणि मानवाधिकारांचा संदेश देशभर पोहोचविण्याचे कार्य या माध्यमातून घडले आहे.
