देगलूर प्रतिनिधी : नांदेड जिल्ह्यातील देगलूर तालुक्यात सन 2021 ते 2024 या कालावधीत शासनाच्या गाय गोठा योजनेत मोठ्या प्रमाणात भ्रष्टाचार झाल्याचा गंभीर आरोप करण्यात आला आहे. देगलूर पंचायत समिती कार्यालयातील तत्कालीन गटविकास अधिकारी शेखर देशमुख, तत्कालीन एपीओ नामदेवराव ढाले, संबंधित ग्रामसेवक, विस्तार अधिकारी तसेच अभियंता यांनी संगनमत करून तालुक्यातील विविध ग्रामीण भागांमध्ये प्रत्यक्षात गाय गोठे न बांधता लाखो रुपयांचा अपहार केल्याचा आरोप करण्यात आला आहे.
या प्रकरणी माधव संभाजीराव मारकवाड यांनी मागील तीन महिन्यांपासून सातत्याने पाठपुरावा केला असून, विभागीय आयुक्त कार्यालयाकडे यासंदर्भात सविस्तर तक्रार सादर केली होती. तथापि, अद्यापपर्यंत कोणतीही चौकशी किंवा संबंधितांवर कारवाई करण्यात आलेली नाही. त्यामुळे प्रशासनाच्या भूमिकेबाबत नाराजी व्यक्त केली जात आहे.
