देगलुर प्रतिनिधी : देगलुर शहरातील विविध सामाजिक प्रश्नांवर सातत्याने लढा देत जनतेचा आवाज बुलंद करणारे सामाजिक कार्यकर्ते धनाजी जोशी यांना यंदाचा प्रतिष्ठेचा राज्यस्तरीय ‘समाजरत्न पुरस्कार’ जाहीर झाला आहे. राज्यभर कार्यरत असलेल्या दैनिक लोकनेता वृत्तपत्राच्या वतीने दरवर्षी दिला जाणारा हा पुरस्कार यंदा त्यांच्या उल्लेखनीय सामाजिक कार्याची दखल घेत प्रदान करण्यात येत आहे.
देगलुर येथील मोडकळीस आलेल्या जुन्या बसस्थानकाच्या पुनर्बांधणीसाठी त्यांनी संभाजीनगर उच्च न्यायालयात याचिका दाखल करून प्रशासनाला बांधकाम सुरू करण्यास भाग पाडले होते. तसेच शासकीय पशुवैद्यकीय दवाखान्याची दुरवस्था दूर करून नवीन इमारतीच्या उभारणीसाठी पाठपुरावा केला. खासगी रुग्णालयांमध्ये होणाऱ्या रुग्णांच्या आर्थिक लुटीविरोधात आवाज उठवत दरपत्रक लावण्याची मागणीही त्यांनी प्रभावीपणे केली होती.
