देगलूर प्रतिनिधी :- देगलूर शहरातील पीएम श्री जिल्हा परिषद प्राथमिक शाळेची मुख्य रस्त्यालगत असलेली संरक्षण भिंत अत्यंत मोडकळीस आली असून ती कोणत्याही क्षणी कोसळण्याची शक्यता निर्माण झाली आहे. या रस्त्यावर दिवसभर विद्यार्थी, पालक आणि नागरिकांची मोठ्या प्रमाणात वर्दळ असल्याने गंभीर जीवितहानी होण्याची भीती व्यक्त केली जात आहे.
या संदर्भात शाळा प्रशासनाने प्राथमिक शिक्षण विभाग, जिल्हा परिषद नांदेड तसेच बांधकाम विभागाशी सातत्याने पत्रव्यवहार केला आहे. मात्र संबंधित विभागांकडून सदर भिंत पाडून नव्याने बांधण्यासाठी निधी उपलब्ध नसल्याचे कळविण्यात आले आहे. दरम्यान, या धोकादायक परिस्थितीची दखल घेत शाळा प्रशासनाने जिल्हाधिकारी नांदेड यांच्याकडेही निवेदन सादर करून तातडीने हस्तक्षेप करण्याची मागणी केली आहे. विद्यार्थ्यांच्या सुरक्षिततेचा प्रश्न ऐरणीवर आला असून वेळेत उपाययोजना न झाल्यास मोठी दुर्घटना घडण्याची शक्यता नाकारता येत नाही.
स्थानिक नागरिक, पालक व शाळा व्यवस्थापन यांनी जिल्हा प्रशासनाने तातडीने या प्रकरणाची पाहणी करून मोडकळीस आलेली संरक्षण भिंत पाडून नव्याने मजबूत संरक्षण भिंत उभारण्यासाठी आवश्यक निधी मंजूर करावा, अशी मागणी केली आहे. कोणतीही अनुचित घटना घडण्यापूर्वी संबंधित विभागाने त्वरित कारवाई करावी, अशी अपेक्षा व्यक्त होत आहे.