देगलूर प्रतिनिधी : शहरातील व्यंकटेश्वरा नगर–घनश्याम नगर, रामपूर रोड परिसरातील प्रभाग क्रमांक 12 मधील मुख्य रस्त्याची मोठ्या प्रमाणात दुरवस्था झाली आहे. रस्त्यावर ठिकठिकाणी मोठमोठे खड्डे पडले असून, पावसामुळे त्यामध्ये पाणी व चिखल साचत आहे. त्यामुळे पायी चालणेही कठीण झाले असून, नागरिकांना चप्पल-बूट हातात घेऊन चिखलातून मार्ग काढावा लागत आहे.
रस्त्याची खराब अवस्था असल्याने दुचाकीस्वारांना घसरून अपघात होण्याचा धोका निर्माण झाला आहे. शाळकरी विद्यार्थी, महिला, ज्येष्ठ नागरिक तसेच रोज कामानिमित्त ये-जा करणाऱ्या नागरिकांना याचा मोठा त्रास सहन करावा लागत आहे. पावसाळ्यात परिस्थिती आणखी गंभीर होत असून, रस्त्यावर साचलेल्या पाण्यामुळे खड्ड्यांचा अंदाज येत नसल्याने वाहनचालकांसाठीही हा मार्ग धोकादायक ठरत आहे.
