देगलूर प्रतिनिधी :- देगलूर येथे नांदेड जिल्हा ग्रंथालय संघ व जिल्हा ग्रंथालय अधिकारी कार्यालय, नांदेड यांच्या मार्गदर्शनाखाली देगलूर, मुखेड, बिलोली व नायगाव तालुक्यातील सार्वजनिक ग्रंथालयांचे पदाधिकारी, कर्मचारी व कार्यकर्त्यांसाठी एकदिवसीय कार्यशाळा आयोजित करण्यात आली. यावेळी मराठवाडा विभागीय ग्रंथालय संचालक सुनील हुस्से, नांदेड जिल्हा ग्रंथालय अधिकारी अनिल सूर्यवंशी, वै. धुंडा महाराज देगलूरकर महाविद्यालयाचे ग्रंथालय प्रमुख डॉ. अनिल जाधव आणि प्रख्यात विचारवंत गंगाधरराव बनबरे यांनी ग्रंथालय चळवळीसमोरील विविध प्रश्नांवर मार्गदर्शन केले. महाराष्ट्रातील सार्वजनिक ग्रंथालयांच्या 40 टक्के अनुदानवाढीसह दर्जोन्नती, नवीन ग्रंथालयांना मान्यता आदी प्रलंबित मागण्यांबाबत शासनाची भूमिका सकारात्मक असून त्या यथावकाश पूर्ण होतील, असे सुनील हुस्से यांनी सांगितले.
नांदेड जिल्हा ग्रंथालय चळवळीत आघाडीवर असून, डॉ. बाबासाहेब आंबेडकर आदर्श वाचनालय पुरस्कारासाठी पात्र असलेल्या ग्रंथालयांनी प्रस्ताव सादर करण्यासाठी पुढे यावे, असे आवाहन त्यांनी केले. तसेच पत्रकार हे शासन व्यवस्थेचे चौथे स्तंभ असून ग्रंथालय संचालकांनी त्यांच्याशी सातत्याने सुसंवाद ठेवावा, असेही त्यांनी सांगितले.
