वैद्यकीय मंत्री अमित देशमुख यांनी महाड दुर्घटनेतील जखमींचे विचारपूस केली

मुंबई, दि. २७ – अतिवृष्टीमुळे महाडच्या तळीये गावात दरड कोसळून झालेल्या दुर्घटनेतील १६ जखमींवर जे. जे. रुग्णालयात उपचार सुरू आहेत. वैद्यकीय शिक्षणमंत्री अमित विलासराव देशमुख यांनी आज जखमींच्या प्रकृतीची विचारपूस केली. जखमींच्या उपचाराचा सर्व उपचार राज्य शासन करणार असून अशा संकटात शासन आपल्या पाठीशी असल्याची ग्वाही त्यांनी यावेळी दिली.

आज सकाळी वैद्यकीय शिक्षणमंत्री अमित विलासराव देशमुख यांनी जे. जे. रुग्णालयाला भेट दिली. महाडच्या तळीये गावात दरड कोसळून झालेल्या दुर्घटनेतील जखमींवर येथे उपचार सुरू असून सर्व जखमींची यावेळी त्यांनी विचारपूस केली. सर्व जखमींची प्रकृती स्थिर असून ज्या जखमींवर शस्त्रक्रियेची आवश्यकता आहे, त्यांच्यावर शस्त्रक्रिया करण्यात येणार आहे. काही जखमींवर अतिदक्षता रुग्णालयात योग्य उपचार सुरू असून काळजीचे कोणतेही कारण नसल्याचे वैद्यकीय शिक्षणमंत्र्यांनी यावेळी सांगितले.

दरडग्रस्तांना सर्व आवश्यक ती मदत पोहोचविण्याबरोबरच त्यांचे पुनर्वसन करण्यात येणार असून त्यासाठी तातडीने ठोस पावले उचलून उपाययोजना करण्यात येणार असल्याचेही अमित देशमुख यांनी सांगून या नैसर्गिक संकटात शासन आपल्या पाठीशी असल्याची ग्वाहीही यावेळी त्यांनी दिली.

कोविडच्या संभाव्य तिसऱ्या लाटेची शक्यता गृहित धरून सर्व आवश्यक ती पूर्वतयारी करण्यात आली आहे. त्याशिवाय पूरग्रस्त भागात रोगराई पसरणार नाही यासाठी आरोग्य विभागाकडून सर्व वैद्यकीय सुविधा पुरविल्या जाणार आहेत. डेंग्यूसह इतर रोगांचा मुकाबला करण्यासाठी आरोग्य व्यवस्था तत्पर ठेवण्यात आली आहे.  या संकटाच्या काळात मदतीसाठी धावून जाणाऱ्या महाराष्ट्रातील नागरिकांचे अमित देशमुख यांनी आभार मानले आहेत.