नांदेड दि. ०९ :- स्वत:च्या उपजत आदिवासी ज्ञानाला जवळ करत या मुलींच्या पालकांनी मनाची घालमेल सांभाळून शाळेत घातले. शासनाच्या एकात्मिक आदिवासी विकास प्रकल्प किनवट अंतर्गत या मुली निवासासह बारावी पर्यंत शिक्षण घेऊन स्वत:च्या पायावर उभे राहण्यासाठी सिद्धही झाल्या. पुढे काय हा प्रश्न त्यांच्या समोर होता. सहायक जिल्हाधिकारी तथा प्रकल्प संचालक किर्तीकिरण एच. पुजार यांनी या मुलींच्या मनातील घालमेल ओळखली.
शिक्षणासाठी घरच्या मर्यादा लक्षात घेऊन या मुली जिद्दीने बारावी पर्यंत शिकल्या. पुढील शिक्षणापेक्षा कायदानुसार वय पूर्ण झाले की लागलीच लग्न लावून मोकळे होणे ही जवळपास सर्व आदिवासी पालकांची मानसिकता या मुलींच्या भविष्याला मर्यादा घालणारी आहे. यापेक्षा या मुलींना स्वयंरोजगाराच्यादृष्टिने, त्यांच्या पायावर त्यांना उभे करण्याच्यादृष्टिने दोन वर्षापूर्वी पुजार यांनी टाटा इलेक्ट्रॉनिक्स कंपनीशी बोलणे केले. सामाजिक कृतज्ञता आणि तत्परता यासाठी आदर्श मापदंड निर्माण करणाऱ्या टाटा कंपनीने यावर तात्काळ प्रतिसाद देत मुलींच्या निवडीसाठी सरळ किनवट गाठले.
ज्या आदिवासी मुलींना स्वत:ला सिद्ध करायचे आहे अशा मुलींनी पुढे यावे असे आवाहन करून प्रकल्प संचालक पुजार यांनी आदिवासी तालुका असलेल्या किनवट येथे दोन दिवसीय शिबिर आयोजित केले. याची यवतमाळ, धारणी येथील केंद्रांना कल्पना देऊन तेथील मुलींनाही निमंत्रित केले. दिनांक ६ व ७ सप्टेंबर रोजी झालेल्या दोन दिवसीय शिबिरासाठी ६०० मुली यात सहभागी झाल्या. टाटा इलेक्ट्रॉनिक्स कंपनीने एक स्वतंत्र मानव संसाधन विभागाचे पथक बेंगळूरू येथून दाखल झाले. त्यांनी त्यांच्या निवड पद्धतीने यातील तब्बल ४१० मुलींची निवड केली. या सर्व मुलींना बेंगळूरू येथे विशेष प्रशिक्षण देऊन तेथून 50 किमी अंतरावर असलेल्या होसुर येथील टाटाच्या मोबाईल पार्टस् व इलेक्ट्रॉनिक्स विभागात रुजू केले जाणार आहे.
