जागतिक योग दिनानिमित्त नांदेडमध्ये भव्य योग शिबिराचे आयोजन.
नांदेड प्रतिनिधी : भारतीय जनता पार्टी नांदेड महानगरच्या वतीने जागतिक योग दिनानिमित्त रविवार, दि. २१ जून २०२६ रोजी सकाळी ६ वाजता गुरुग्रंथ भवन, यात्री निवास, नांदेड येथे भव्य योग शिबिराचे आयोजन करण्यात आले आहे. या कार्यक्रमाचे उद्घाटन महाराष्ट्राचे माजी मुख्यमंत्री तथा खासदार अशोकराव चव्हाण यांच्या हस्ते होणार असल्याची माहिती भाजपा महानगर अध्यक्ष अमरनाथ राजूरकर, मनपा स्थायी समिती सभापती विरेंद्रसिंघ गाडीवाले आणि योग दिन संयोजक धर्मभूषण ॲड. दिलीप ठाकूर यांनी दिली.
भारतीय संस्कृतीची जगाला मिळालेली अमूल्य देणगी असलेल्या योगाचा प्रसार आणि निरोगी जीवनशैलीचा संदेश जनमानसात पोहोचविण्याच्या उद्देशाने या कार्यक्रमाचे आयोजन करण्यात आले आहे. भारताच्या पुढाकारामुळे संयुक्त राष्ट्र संघाने २१ जून हा दिवस ‘आंतरराष्ट्रीय योग दिन’ म्हणून घोषित केला असून जगभरातील १९० हून अधिक देशांमध्ये तो उत्साहात साजरा केला जातो.
या विशेष कार्यक्रमात आंतरराष्ट्रीय ख्यातीचे योगगुरू आचार्य सुनील जोशी यांचे मार्गदर्शन लाभणार असून अनुभवी योग प्रशिक्षक सुरेश लंगडापुरे यांच्या नेतृत्वाखाली योगासने, प्राणायाम आणि आरोग्यविषयक प्रात्यक्षिके सादर करण्यात येणार आहेत.
कार्यक्रमास खासदार डॉ. अजित गोपछडे, आमदार श्रीजया चव्हाण, भाजपा प्रदेश उपाध्यक्ष संजय कोडगे, ॲड. चैतन्य देशमुख, माजी पालकमंत्री डी. पी. सावंत, भाजपा जिल्हाध्यक्ष डॉ. संतुकराव हंबर्डे, ॲड. किशोर देशमुख, महापौर कविता मुळे, उपमहापौर दीपकसिंह रावत, सभागृह नेते ॲड. महेश कनकदंडे तसेच लायन्स उपप्रांतपाल योगेश जायस्वाल यांच्यासह अनेक मान्यवर उपस्थित राहणार आहेत.
योगाच्या माध्यमातून शारीरिक तंदुरुस्ती, मानसिक स्वास्थ्य, तणावमुक्त जीवनशैली आणि सकारात्मक विचारांचा प्रसार करण्याचा प्रयत्न या शिबिरातून केला जाणार आहे. या कार्यक्रमात भाजपा पदाधिकारी व कार्यकर्ते, पतंजली परिवार, आर्ट ऑफ लिव्हिंगचे सदस्य, अमरनाथ यात्री संघ, लायन्स परिवार, विविध शाळांतील विद्यार्थी, महिला, युवक, ज्येष्ठ नागरिक तसेच सर्वसामान्य नागरिक मोठ्या संख्येने सहभागी होणार आहेत.
योग शिबिराच्या यशस्वी आयोजनासाठी भाजपा महानगर सरचिटणीस विजय येवणकर, शीतल खांडील, विजय गंभीरे, सुषमा थोरात, योग सहसंयोजक कामाजी सरोदे आणि सुरेश लोट हे विशेष परिश्रम घेत आहेत.
पंतप्रधान नरेंद्र मोदी यांच्या नेतृत्वाखालील केंद्र सरकारच्या १२ वर्षांच्या यशस्वी कार्यकाळानिमित्त आयोजित विविध उपक्रमांच्या मालिकेतील हा महत्त्वपूर्ण कार्यक्रम असल्याचे आयोजकांनी सांगितले. नांदेड शहरातील नागरिक, विद्यार्थी, महिला, युवक, ज्येष्ठ नागरिक, सामाजिक संस्था आणि स्वयंसेवी संघटनांनी मोठ्या संख्येने उपस्थित राहून कार्यक्रम यशस्वी करावा, असे आवाहन भारतीय जनता पार्टी नांदेड महानगरच्या वतीने करण्यात आले आहे.
