रुग्णसेवेचा नवा विश्वास; डॉक्टर देवणीकर आल्यापासून देगलूरकरांच्या भावना सकारात्मक — भविष्यातही पुरस्कारांचे मानकरी ठरण्याची अपेक्षा.
देगलूर प्रतिनिधी,दि.०८:- येथील उपजिल्हा रुग्णालयाने रुग्णसेवेच्या क्षेत्रात पुन्हा एकदा उल्लेखनीय कामगिरी करून दाखवली आहे. जिल्हा शल्यचिकित्सक डॉ. पेरेके यांच्या मार्गदर्शनाखाली व वैद्यकीय अधीक्षक डॉ. नरेश देवणीकर यांच्या सक्षम नेतृत्वाखाली रुग्णालयात तब्बल २७ यशस्वी शस्त्रक्रिया पार पाडण्यात आल्या.
या शस्त्रक्रिया शिबिरामुळे सिझेरियन प्रसूतीचे वार्षिक उद्दिष्टही यशस्वीरित्या पूर्ण झाले आहे.
या शिबिरात मेजर व मायनर स्वरूपाच्या विविध शस्त्रक्रिया करण्यात आल्या. सिझेरियन, हर्निया, अॅपेंडिक्स तसेच कुटुंब नियोजनाच्या शस्त्रक्रियांचा समावेश असून सर्व रुग्णांची प्रकृती स्थिर असल्याची माहिती देण्यात आली आहे. हे यश केवळ वैद्यकीय कौशल्याचेच नव्हे, तर शिस्तबद्ध व्यवस्थापन व समन्वयाचेही फलित असल्याचे बोलले जात आहे.
विशेष म्हणजे डॉ. नरेश देवणीकर यांनी उपजिल्हा रुग्णालयाची सूत्रे हाती घेतल्यानंतर रुग्णालयाबाबत देगलूरकरांमध्ये सकारात्मक वातावरण निर्माण झाले आहे. पूर्वी उपचारासाठी बाहेरच्या रुग्णालयांकडे धाव घेणारे रुग्ण आता विश्वासाने उपजिल्हा रुग्णालयाकडे वळत असल्याचे चित्र दिसत आहे. “सरकारी रुग्णालयातही दर्जेदार सेवा मिळू शकते,” हा विश्वास नागरिकांमध्ये बळावत आहे.
या यशामागे शल्यचिकित्सक, भूलतज्ज्ञ, परिचारिका, ओटी स्टाफ व इतर कर्मचाऱ्यांचे समन्वयपूर्ण योगदान महत्त्वाचे ठरले आहे. संपूर्ण आरोग्य यंत्रणेने टीमवर्कच्या माध्यमातून ही कामगिरी साध्य केल्याने रुग्णालयाची प्रतिमा अधिक उंचावली आहे.
आरोग्य क्षेत्रात सातत्यपूर्ण कामगिरी, रुग्णकेंद्रित दृष्टिकोन व कार्यक्षम नेतृत्व पाहता येणाऱ्या काळातही देगलूर उपजिल्हा रुग्णालय हे विविध पुरस्कारांचे मानकरी ठरेल, असा विश्वास नागरिकांमधून व्यक्त होत आहे.
ग्रामीण भागातील रुग्णांसाठी आशेचा किरण ठरलेले हे रुग्णालय पुढील काळातही आरोग्यसेवेचा नवा आदर्श निर्माण करेल, अशी अपेक्षा व्यक्त केली जात आहे.