व्यापारी एज्युकेशनल फाउंडेशनचा २० वा सन्मान समारंभ हैदराबादमध्ये दिमाखात संपन्न
हैदराबाद – व्यापारी एज्युकेशनल फाउंडेशनच्या वतीने आयोजित करण्यात आलेला २० वा सन्मान समारंभ रविवारी (१५ मार्च २०२६) सायंकाळी ७ वाजता लकडी-का-पूल येथील हॉटेल अबोड (हॉटेल श्री वेंकटेश्वरा) येथील बँक्वेट हॉलमध्ये दिमाखदार वातावरणात आणि उत्साहात संपन्न झाला. कार्यक्रमास विविध क्षेत्रातील मान्यवर, शिक्षक, सामाजिक कार्यकर्ते तसेच नागरिक मोठ्या संख्येने उपस्थित होते.
कार्यक्रमाच्या सुरुवातीस व्यापारी एज्युकेशनल फाउंडेशनच्या वतीने संस्थेच्या कार्याचा आढावा देण्यात आला. गेल्या वीस वर्षांपासून हा सन्मान समारंभ अविरतपणे आयोजित केला जात असून शिक्षण क्षेत्रात उल्लेखनीय कार्य करणाऱ्या व्यक्ती व संस्थांचा गौरव करण्याची ही परंपरा असल्याचे यावेळी सांगण्यात आले. कोविड महामारीच्या काळात केवळ दोन वर्षे हा कार्यक्रम घेता आला नाही, याची खंतही व्यक्त करण्यात आली.
या कार्यक्रमाच्या आयोजनासाठी समाजातील अनेक व्यक्ती व संस्थांनी सढळ हाताने मदत करत संस्थेच्या कार्याला सातत्याने प्रोत्साहन दिले, असेही नमूद करण्यात आले. अशा प्रकारचे सन्मान समारंभ आयोजित केल्यामुळे समाजातील इतरांनाही प्रेरणा मिळते आणि शिक्षण क्षेत्रातील सेवाभावी कार्याला बळ मिळते, असे मत यावेळी व्यक्त करण्यात आले.
यावेळी विविध क्षेत्रात उल्लेखनीय कार्य करणाऱ्या व्यक्ती व संस्थांचा गौरव करण्यात आला. गुरुश्रेष्ठ सन्मान सौ. दया दांडेकर व श्री गजानन लाठकर यांना प्रदान करण्यात आला. शिक्षा सेवक सन्मान कर्नाटक राज्यातील कलबुर्गी येथील माथोश्री अंबुबाई रेसिडेन्शियल स्कूल फॉर ब्लाइंड गर्ल्स या संस्थेला प्रदान करण्यात आला. तसेच शिक्षा साधक सन्मान सौ. जसविंदर कौर एस (जस्सी) यांना देण्यात आला, तर माऊली सन्मान सौ. सुलोचना बाई काळोजी यांना प्रदान करून त्यांचा गौरव करण्यात आला.
यावेळी बोलताना आयोजकांनी सांगितले की, समाजातील प्रत्येकाने आपल्या कुटुंबातील व नातेसंबंधातील ज्येष्ठ व्यक्तींचा सन्मान करण्याची परंपरा जपली पाहिजे. विशेषतः माऊली सन्मानासारखे उपक्रम आपल्या आप्तेष्ट व नातेवाईकांनीही आयोजित करावेत, अशी अपेक्षाही व्यक्त करण्यात आली.
कार्यक्रमाचे आयोजन व्यापारी एज्युकेशनल फाउंडेशनचे अध्यक्ष किशोर व्यापारी यांच्या मार्गदर्शनाखाली करण्यात आले. कार्यक्रम संपल्यानंतर उपस्थितांसाठी प्रीती भोजचे आयोजन करण्यात आले होते. उपस्थित मान्यवर व पाहुण्यांनी या स्नेह भोजनाचा मनमुराद आस्वाद घेत कार्यक्रमाची सांगता झाली.
“या कार्यक्रमाचे मला औपचारिक आमंत्रण नसतानाही योगायोगाने हा कार्यक्रम पाहण्याची संधी मिळाली. कार्यक्रमाचे उत्कृष्ट नियोजन, समाजहिताची भावना आणि सन्माननीय व्यक्तींचा गौरव करण्याची परंपरा पाहून मनापासून आनंद झाला. अशा स्तुत्य उपक्रमाबद्दल साप्ताहिक महिमा खादीचा यांच्या वतीने आयोजकांचे मनःपूर्वक कौतुक करण्यात येत आहे.”
मुख्य संपादक,
साप्ताहिक महिमा खादीचा
गजानन बिडकर
मो.9890476595
e-mail mahimakhadicha@gmail.com
Website:- www.mahimakhadicha.com