देगलूर प्रतिनिधी:- आज दिनांक २८ एप्रिल २०२६ रोजी देगलूर नगर परिषद कार्यालयात “महाराष्ट्र लोकसेवा हक्क दिन” नगर परिषद कर्मचाऱ्यांच्या वतीने उत्साहात साजरा करण्यात आला.
यावेळी मा. नगराध्यक्षा सौ. विजयमाला बालाजीराव टेकाळे तसेच मा. मुख्याधिकारी श्रीमती निलम कांबळे मॅडम यांच्या सूचनेनुसार नगर परिषदेमधील सर्व अधिकारी व कर्मचाऱ्यांनी महाराष्ट्र लोकसेवा हक्क अधिनियम २०१५ अंतर्गत नागरिकांना पारदर्शक, वेळेत व सौजन्यपूर्ण सेवा देण्याबाबत सामूहिक शपथ घेतली.
शपथेमध्ये, शासनाच्या सेवा विहित कालमर्यादेत पात्र नागरिकांना उपलब्ध करून देणे, सोपविण्यात आलेली जबाबदारी प्रामाणिकपणे, निष्ठेने, सचोटीने, संवेदनशीलतेने व तत्परतेने पार पाडणे, तसेच सेवा वितरण प्रक्रियेत कोणत्याही प्रकारचा विलंब, अडथळा अथवा भ्रष्टाचार होऊ न देणे आणि नागरिकांच्या हक्कांचे जतन करण्यासाठी सदैव कटिबद्ध राहण्याचा निर्धार व्यक्त करण्यात आला.
या प्रसंगी नगर परिषद देगलूर कार्यालयातील सर्व विभागांचे अधिकारी व कर्मचारी उपस्थित होते. लोकाभिमुख प्रशासनाची जाणीव दृढ करण्यासाठी आणि नागरिकांना त्वरित व पारदर्शक सेवा देण्याच्या उद्देशाने हा उपक्रम राबविण्यात आला.