सई परांजपे यांच्या ‘दरवळ’ने हैदराबादकर रसिक मंत्रमुग्ध.
हैदराबाद प्रतिनिधि: मराठी साहित्य परिषद, हैदराबाद यांच्या वतीने ज्येष्ठ लेखिका, नाटककार व चित्रपट दिग्दर्शिका सई परांजपे यांच्या ‘दरवळ’ या विशेष कार्यक्रमाचे आयोजन १६ ऑगस्ट रोजी भारतीय विद्या भवन, हैदराबाद येथे करण्यात आले. साहित्य, नाटक आणि चित्रपटाच्या आठवणींनी रंगलेल्या या कार्यक्रमाने हैदराबादकर रसिकांना मंत्रमुग्ध केले.
दीपप्रज्वलन व शारदा स्तवनाने कार्यक्रमाची सुरुवात झाली. यावेळी हैदराबादचे ज्येष्ठ रंगकर्मी प्रकाश फडणीस यांचा सई परांजपे यांच्या हस्ते सन्मान करण्यात आला.
सई परांजपे यांनी फ्रान्समधील वडिलांच्या भेटीवरील लेख, मांजरींवरील विनोदी लेख, विविध नाटकांतील प्रवेश तसेच ‘स्पर्श’ आणि ‘साज’ या चित्रपटांतील पटकथांचे प्रभावी अभिवाचन केले. मराठी भाषेत इंग्रजी शब्दांच्या वाढत्या वापरावर आधारित त्यांच्या कवितेलाही रसिकांकडून उत्स्फूर्त दाद मिळाली.
कार्यक्रमानंतर सई परांजपे यांनी उपस्थित रसिकांना स्वाक्षरीसह सोनचाफ्याची फुले देऊन कार्यक्रमाची आठवण अधिकच खास केली. कार्यक्रमाचे सूत्रसंचालन उज्ज्वला धर्म यांनी केले.