नांदेड प्रतिनिधी दि.१२ :- शासकीय विद्यानिकेतन अर्थात गव्हर्नमेंट पब्लिक स्कुलच्या महाराष्ट्रातील पाच ही शाळेच्या माजी विद्यार्थ्यांचा “महामेळावा २०२५” बंटारा भवन, बाणेर रोड, पुणे येथे १४ ते १६ नोव्हेंबर २०२५ रोजी होत असून, या महाजागरात २००० माजी विद्यार्थी उपस्थित राहून एक विक्रम करणार आहेत. नांदेड जिल्ह्यातील माजी विद्यार्थ्यांनी गुरुवार दि.१३ नोव्हेंबर रोजी सायंकाळी पाच वाजता नांदेड पुणे एक्सप्रेसने जाण्यासाठी रेल्वे स्टेशनवर उपस्थित रहावे असे आवाहन मुखेड भूषण डॉ. दिलीप पुंडे, धर्मभूषण ॲड. दिलीप ठाकूर, काँग्रेस प्रदेश सरचिटणीस श्रावण रॅपणवाड, ज्येष्ठ पत्रकार प्रदीप लोखंडे यांनी केले आहे.
“शाळेच्या गप्पा — आठवणींची मस्ती, पुण्यात पुन्हा तीच दोस्ती!” हे भावनिक घोषवाक्य घेऊन आयोजित महा मेळाव्यात नांदेडसह मराठवाड्यातून ५६७ माजी विद्यार्थी या महोत्सवात हजेरी लावणार आहेत.१९६६ साली स्थापन झालेल्या शासकीय विद्यानिकेतनांच्या छ.संभाजीनगर, कोयनानगर/सातारा/पुसेगाव, नाशिक/धुळे, चिखलदरा/अमरावती, यवतमाळ/केळापूर या पाच ठिकाणी शाळा सुरु आहेत.ग्रामीण भागातील हुशार विद्यार्थ्यांना दर्जेदार शिक्षण मिळावे यासाठी माजी शिक्षणमंत्री मधुकरराव चौधरी यांच्या संकल्पनेतून या शाळा सुरु करण्यात आल्या.
या शाळेतील शेकडो विद्यार्थी प्रशासकीय सेवा, राजकारण, समाजकारण, वैद्यकीय व अभियांत्रिकी सेवेत उत्कृष्ट सेवा देऊन शाळेचे नावलौकिक वाढवत आहेत.या पाच शाळेचे शेकडो माजी विद्यार्थी एकत्र येऊन, जुन्या आठवणींना उजाळा देत समाजोपयोगी कार्याचे नवीन मार्ग ठरवणार आहेत.
शासकीय विद्या निकेतन माय माऊलीस पुन्हा गत सुवर्णकाळ प्राप्त करून देण्यासाठी माजी बांधव सातत्याने प्रयत्न करीत असून या प्रयत्नांची गती वाढविण्यासाठीही दिशा ठरविण्यात येणार आहे.
१४ नोव्हेंम्बर हा ओळख आणि स्वागताचा दिवस असणार असून पहिल्या दिवशी आगमनानंतर स्वागत समारंभ, ओळखपर सत्र, गप्पा होणार आहेत. रात्री विद्यानिकेतन गुणदर्शन सांस्कृतिक कार्यक्रमाने मेळाव्याची रंगत वाढवली जाईल.१५ नोव्हेंबर रोजी अनुभव, विचार आणि प्रेरणा या धर्तीवर सकाळी पीटी सत्राने दिवसाची सुरुवात होईल.
यानंतर “गॅलॅक्सी ऑफ जिपीएस:विद्यानिकेतनचे दिवंगत तारे” या भावपूर्ण श्रद्धांजली सत्रासोबत विद्यार्थी परिषदा, गिव्ह बॅक फौंडेशन चं कार्य, साहित्यिक आणि सामाजिक कार्याचे अनुभववाटप आदी कार्यक्रम आयोजित केले आहेत.दुपारी ‘विद्यानिकेतनचे ऋण फेडण्याचा संकल्प’ आणि ‘विद्यानिकेतनच्या लेखकांच्या पुस्तकांचे प्रकाशन’ हा प्रेरणादायी उपक्रम होईल.
रात्री “टूर्निंग पॉइंट्स ईन लाईफ ” या विषयावर मनमोकळा विचारमंथन सत्र होणार आहे.
१६ नोव्हेंबर हा करिअर आणि पुढच्या पिढ्यांसाठी मार्गदर्शनाचा दिवस असणार आहे. या दिवशी तरुण, होतकरू माजी, आजी विद्यार्थ्यांना करिअर मार्गदर्शन, यशोगाथा,फोटो व सेल्फी सत्र, स्मृतिचिन्ह वितरण असे कार्यक्रम आयोजित केले आहेत.
या सर्व कार्यक्रमांनंतर मेळाव्याचा समारोप दुपारी होईल.
माजी विद्यार्थ्यांमध्ये या महामेळाव्याबाबत प्रचंड उत्सुकता असून, जगभरातील २००० पेक्षा जास्त माजी विद्यार्थी पुण्यात भेटणार आहेत.महामेळाव्याची जय्यत तय्यारी सुरु असून आयोजन समिती गेल्या आठ महिन्यांपासून अविश्रांत परिश्रम घेत आहे.