हदगाव प्रतिनिधी दि.३१ :- साईबाबा निवासी दिव्यांग विद्यालय, सम्राट अशोक निवासी मतिमंद विद्यालय तसेच निवासी मूकबधिर विद्यालय, हदगाव (जिल्हा नांदेड) यांच्या संयुक्त विद्यमाने मंगळवार, दि. ३० डिसेंबर २०२५ रोजी विद्यालयाच्या प्रांगणात भव्य पालक मेळाव्याचे आयोजन करण्यात आले होते. विशेष गरजा असलेल्या विद्यार्थ्यांच्या सर्वांगीण विकासासाठी पालक–शाळा समन्वय अधिक दृढ करण्याच्या उद्देशाने हा मेळावा घेण्यात आला.
या कार्यक्रमासाठी प्रादेशिक उपायुक्त कार्यालय, लातूर येथील माननीय श्री. अविनाश देवसटवार हे प्रमुख अतिथी म्हणून उपस्थित होते. तसेच संस्थेचे अध्यक्ष माननीय डॉ. प्राचार्य वसीययोद्दीन मुजावर, माननीय डॉ. प्राचार्य नागनाथ पाटील, माननीय श्री. बालाजी ईबितदार आणि माननीय श्री. गजानन मुधोळ पाटील यांनी विशेष उपस्थिती दर्शवली.
मेळाव्यात पालक जागृतीचे महत्त्व अधोरेखित करताना, चांगला नागरिक घडवणे हे आजचे मोठे आव्हान असल्याचे वक्त्यांनी नमूद केले. विद्यार्थ्यांच्या शिक्षणप्रक्रियेत पालकांनी सक्रिय सहभाग घ्यावा, तसेच शाळा व पालक यांच्यातील समन्वय अधिक मजबूत झाला पाहिजे, यावर विशेष भर देण्यात आला. शिक्षक आणि पालकांमधील संवाद वाढवण्यासाठी हा मेळावा एक प्रभावी मंच ठरला.
भविष्यात विद्यार्थ्यांच्या उज्ज्वल भविष्यासाठी शाळा व पालकांनी एकत्रितपणे काम करण्याचा निर्धार पालकांनी व्यक्त केला. कार्यक्रमाच्या यशस्वी आयोजनासाठी विविध समित्यांची स्थापना करण्यात आली होती. समिती प्रमुखांचे शब्दसुमनांनी स्वागत करून त्यांचा सन्मान करण्यात आला.
कार्यक्रमाचे सूत्रसंचालन श्री. भास्कर देवसरकर आणि सौ. सारिका जाधव यांनी केले, तर आभार प्रदर्शन श्री. गजानन मोरे यांनी केले. या मेळाव्यास तिन्ही विद्यालयांचे मुख्याध्यापक, शिक्षक तसेच सर्व कर्मचारीवर्ग मोठ्या संख्येने उपस्थित होते.