नांदेड, प्रतिनिधी दि.०५ :- नांदेड जिल्ह्यातील पाच प्रवर्गाच्या दिव्यांग क्षेत्रातील मुख्याध्यापक, व्यवस्थापकीय अधीक्षक व बारा समिती प्रमुखांची दिव्यांग विद्यार्थ्यांच्या क्रीडा स्पर्धा व सांस्कृतिक महोत्सव आयोजनाबाबत महत्त्वाची बैठक काल डायट कॉलेज, श्रीनगर, नांदेड येथे पार पडली.
या बैठकीत दिनांक १९ जानेवारी २०२६ रोजी सकाळी १० वाजता सायन्स कॉलेज, नांदेड येथे दिव्यांग विद्यार्थ्यांच्या क्रीडा स्पर्धांचे उद्घाटन होणार असून याच कॉलेजच्या मैदानावर पाचही प्रवर्गातील क्रीडा स्पर्धा घेण्याचे निश्चित करण्यात आले. तसेच २० जानेवारी २०२६ रोजी सकाळी ९ वाजता शंकरराव चव्हाण प्रेक्षागृह, नांदेड येथे दिव्यांग विद्यार्थ्यांच्या पाच प्रवर्गातील सांस्कृतिक कार्यक्रमांचे आयोजन करण्यात येणार आहे.
या बैठकीसाठी नांदेड जिल्ह्यातील सर्व १६ तालुक्यांमधील मुख्याध्यापक, व्यवस्थापकीय अधीक्षक व बारा समिती प्रमुख उपस्थित होते. बैठकीत जिल्हा दिव्यांग सक्षमीकरण अधिकारी श्री अवधूत गंजेवार व सहाय्यक सल्लागार श्री दिनकर नाठे यांनी सखोल मार्गदर्शन केले.
स्पर्धांदरम्यान जिल्ह्यातील सर्व विद्यार्थ्यांना पिण्याचे पाणी, प्रथमोपचार सुविधा, नाश्ता, जेवण व एनर्जी ड्रिंक्स देण्याचे ठरविण्यात आले आहे. याशिवाय यावर्षी जिल्हा दिव्यांग सक्षमीकरण अधिकारी कार्यालयाकडून सर्व विद्यार्थ्यांना चांगल्या दर्जाच्या टोप्या देण्याचा निर्णय घेण्यात आला आहे.
चारही प्रवर्गातील विद्यार्थ्यांचा शिस्तपालन, विद्यार्थ्यांचा ड्रेस कोड, सर्व कर्मचाऱ्यांचा तसेच महिलांचा ड्रेस कोड निश्चित करण्यात आला असून त्याची अंमलबजावणी व देखरेख करण्यासाठी विशेष कर्मचाऱ्यांची नियुक्ती करण्यात आली आहे. जिल्हा दिव्यांग क्रीडा स्पर्धा व सांस्कृतिक कार्यक्रमांमध्ये प्रथम, द्वितीय व तृतीय क्रमांक मिळविणाऱ्या संघ व विद्यार्थ्यांना बक्षिसे, सन्मानचिन्हे व प्रमाणपत्रे देण्यात येणार आहेत.
यावर्षीचा जिल्हा दिव्यांग क्रीडा व सांस्कृतिक महोत्सव भूतपूर्वीपेक्षा अधिक यशस्वी व भव्य व्हावा यासाठी जिल्हा दिव्यांग सक्षमीकरण अधिकारी व सहाय्यक सल्लागार यांनी विशेष तयारी केली आहे. या कार्यक्रमाला जिल्हाधिकारी राहुल कर्डिले, जिल्हा परिषदेच्या मुख्य कार्यकारी अधिकारी श्रीमती मेघना कावली, अतिरिक्त मुख्य कार्यकारी अधिकारी श्री संदीप माळोदे, जिल्हा पोलीस अधीक्षक श्री अविनाश कुमार व समाज कल्याण अधिकारी श्री सत्येंद्र आऊलवार यांची प्रमुख उपस्थिती राहणार आहे.
या भव्य कार्यक्रमामुळे जिल्ह्यातील सर्व दिव्यांग विद्यार्थी-विद्यार्थिनी व कर्मचाऱ्यांमध्ये उत्साहाचे व आनंदाचे वातावरण पसरले आहे. कार्यक्रमाचे सूत्रसंचालन श्री मुरलीधर गोडबोले यांनी केले तर आभार प्रदर्शन श्री यादव सोळुंके यांनी मानले.