देगलूर प्रतिनिधी दि.१३:- देगलूर नगरपरिषदेच्या मुख्याधिकारी श्रीमती नीलम कांबळे यांना काँग्रेस पक्षाचे गटनेते शेख मीरामयोद्दीन यांच्या नेतृत्वाखाली नगरसेवक व त्यांच्या प्रतिनिधींनी चमकुमडी परिसरातील हरिजन कॉलनीतील ११ पावतीधारकांना तात्काळ प्लॉट वाटप करण्यात यावे, अशी जोरदार मागणी करत निवेदन दिले.
या निवेदनावर नगरसेवक अविनाश निलमवार, शत्रुघ्न वाघमारे, शेख महेमूद, मोईज हाफिससाब, लक्ष्मण कंधारकर, बालाजी रोयलावार, संजय जोशी, सुनील येशमवार, लालू कोयलावार तसेच नगरसेवक प्रतिनिधी राजाराम कांबळे, शेख जियावोदीन, इलीयास दौलताबादी आदींच्या सह्या होत्या.
चमकुमडी हरिजन कॉलनीतील ११ पावतीधारकांना गेल्या सुमारे ५० वर्षांपासून प्लॉट वाटप झालेले नाही. या अन्यायाविरोधात बौद्ध समाजाच्या वतीने १५ ते २० दिवस धरणे आंदोलन करण्यात आले होते, याची आठवण यावेळी मुख्याधिकारी कांबळे यांना करून देण्यात आली.
या प्रकरणाची गंभीर दखल घेऊन येणाऱ्या सर्वसाधारण सभेत हा विषय मांडावा व संबंधित ११ पावतीधारकांना तात्काळ प्लॉट वाटप करून द्यावे, अशी मागणी काँग्रेस गटनेते शेख मीरामयोद्दीन व सर्व नगरसेवकांनी केली आहे.