नांदेड प्रतिनिधी दि.१५ :- आंतरराष्ट्रीय कथाकार पंडित प्रदीपजी मिश्रा (सिहोरवाले) यांची शिव महापुराण कथा फेब्रुवारी महिन्याऐवजी पूर्वनियोजित वेळापत्रकानुसार दि. १९ ते २५ नोव्हेंबर २०२६ या कालावधीतच नांदेड येथे होणार आहे. यामुळे नांदेडकरांना पुन्हा एकदा भक्तीरसात डुंबण्याची सुवर्णसंधी मिळणार असल्याची माहिती कथा संयोजक धर्मभूषण ॲड. दिलीप ठाकूर यांनी दिली.
फेब्रुवारी २०२६ मध्ये नांदेड येथे कथा होणार असल्याच्या चर्चांनंतर ती रद्द झाल्याने अनेक भक्तांनी दिलीप ठाकूर यांच्याकडे विचारणा केली होती. याबाबत खुलासा करताना त्यांनी सांगितले की, पंडित प्रदीपजी मिश्रा यांच्या कथांना देश-विदेशात प्रचंड प्रतिसाद मिळत असून उपस्थितीचे नवनवे विक्रम प्रस्थापित होत आहेत. परदेशातील कथांनाही अनिवासी भारतीयांकडून मोठा प्रतिसाद मिळत आहे.
गतवर्षी सप्टेंबर २०२५ मध्ये नांदेड येथे झालेल्या कथेसाठी पाच लाखांहून अधिक भाविकांची उपस्थिती लाभली होती. मात्र दोन दिवस मुसळधार पावसामुळे कथेमध्ये व्यत्यय आला होता. तेव्हापासून नांदेडमध्ये पुन्हा एकदा ही कथा आयोजित करण्यासाठी ॲड. दिलीप ठाकूर सातत्याने प्रयत्नशील होते. मात्र पंडित प्रदीपजी मिश्रा यांच्या २०२९ पर्यंतच्या सर्व तारखा आधीच आरक्षित असल्याने आयोजन कठीण झाले होते.
यासाठी दिलीप ठाकूर यांनी स्वतः दोन वेळा सिहोर येथे जाऊन पाठपुरावा केला. अखेर त्यांच्या आग्रहामुळे २०२६ सालासाठी तारीख निश्चित झाली. दरम्यान, फेब्रुवारी २०२६ मध्ये अन्य एका शहरातील कथा रद्द झाल्याने काही भक्तांनी नांदेडमध्ये कथा घेण्याचा प्रयत्न केला होता. मात्र नंतर असमर्थता दर्शविण्यात आली. तसेच निवडणूक कालावधी लक्षात घेता, दिलीप ठाकूर यांनीही फेब्रुवारीतील आयोजनास स्पष्ट नकार दिला.
त्यामुळे दि. १९ ते २५ नोव्हेंबर २०२६ या कालावधीतच नांदेडमध्ये शिव महापुराण कथा होणार असल्याचे स्पष्ट करण्यात आले आहे. सात दिवस चालणारी ही कथा अभूतपूर्व करण्यासाठी एक हजार सक्रिय सदस्यांची भव्य समिती स्थापन करण्यात येणार असून, यासाठी लवकरच व्यापक बैठकीचे आयोजन करण्यात येणार असल्याची माहितीही ॲड. दिलीप ठाकूर यांनी दिली.