हैदराबाद प्रतिनिधी दि.१७ :- संयुक्त राष्ट्रसंघ (यू.एन.) यांच्या मार्गदर्शनाखाली आयोजित करण्यात येणाऱ्या आयरा (UN) आंतरराष्ट्रीय जल परिषदेसाठी हैदराबाद येथील कृषी–जलतज्ज्ञ बोंम्मर बोयिन पृध्वी राम यांना विशेष निमंत्रण प्राप्त झाले आहे.
ही आंतरराष्ट्रीय जल परिषद येत्या २६ व २७ तारखेला पश्चिम आफ्रिकेतील सेनेगल देशाची राजधानी डकार येथे पार पडणार आहे. जलसुरक्षा, हवामान बदल तसेच कृषी क्षेत्राच्या विकास प्रणाली यांमधील परस्परसंबंधावर पृध्वी राम यांनी केलेल्या संशोधन व कार्याची दखल घेत संयुक्त राष्ट्रसंघाने त्यांना या परिषदेत सहभागी होण्याचे आमंत्रण दिले आहे.
या परिषदेत जगभरातील विविध देशांतील कृषी व जलसंपदा क्षेत्रातील संशोधक, तज्ज्ञ सहभागी होणार आहेत. जगभर स्वच्छ पाणी व स्वच्छता उपलब्ध करून देण्यासाठी आवश्यक धोरणे व कार्यपद्धती यावर विविध देशांचे सरकारी प्रतिनिधी व जल संस्थांचे तज्ज्ञ सखोल चर्चा करणार असल्याची माहिती पृध्वी राम यांनी दिली.
संयुक्त अरब अमिरातीमध्ये यावर्षी डिसेंबर महिन्यात संयुक्त राष्ट्रसंघाच्या नेतृत्वाखाली होणाऱ्या आंतरराष्ट्रीय जलसंपदा परिषदेसाठी पूर्वतयारी म्हणून डकार येथे ही आयरा आंतरराष्ट्रीय जल परिषद आयोजित करण्यात आल्याचेही त्यांनी स्पष्ट केले.