देगलूर प्रतिनिधी दि.०२ :- देगलूर येथे नव्याने बांधण्यात आलेल्या तालुका लघु पशुवैद्यकीय सर्व चिकित्सालयास महाराष्ट्राचे उपमुख्यमंत्री तथा लोकनेते अजितदादा पवार यांचे नाव देण्यात यावे, अशी मागणी राष्ट्रवादी ओबीसी फाउंडेशन, महाराष्ट्र राज्यचे मराठवाडा अध्यक्ष धानाजी मनोहरराव जोशी यांनी केली आहे.
याबाबत त्यांनी उपविभागीय अधिकारी कार्यालय, देगलूर यांना लेखी निवेदन दिले असून, अजितदादा पवार यांनी राज्याच्या सर्वांगीण विकासासाठी तसेच विशेषतः कृषी व पशुसंवर्धन क्षेत्रात मोलाचे योगदान दिल्याचे नमूद केले आहे. ग्रामीण भागातील शेतकरी व पशुपालकांसाठी पशुवैद्यकीय सेवांचे महत्त्व लक्षात घेता त्यांच्या कार्याच्या स्मरणार्थ या दवाखान्याला त्यांचे नाव देणे योग्य ठरेल, असे निवेदनात म्हटले आहे.
या मागणीची सहानुभूतीपूर्वक दखल घेऊन प्रशासनाने योग्य तो निर्णय घ्यावा, अशी अपेक्षा व्यक्त करण्यात आली आहे.