रमजान महिन्यात नांदेडच्या दोन चिमुकल्यांचा महिनाभर उपवास; मशिदीत ‘इतेकाफ’ही पूर्ण.
नांदेड प्रतिनिधी:- पवित्र रमजान महिना हा संयम आणि उपासनेचा महिना मानला जातो. याच कडक उन्हाच्या काळात नांदेड येथील दोन १२ वर्षांच्या मुलांनी महिनाभर रोजे (उपवास) ठेवून आणि मशिदीत ‘इतेकाफ’ पूर्ण करून सर्वांसमोर एक वेगळा आदर्श निर्माण केला आहे.
नांदेड येथील शेख अमान मोहम्मद वसीम (वय १२ वर्ष) आणि शेख साजिद युनूस (वय १२ वर्ष) या दोन मित्रांनी रमजानच्या पवित्र महिन्यात एकही रोजा न सोडता पूर्ण महिनाभर उपवास पाळले. विशेष म्हणजे, केवळ उपवासच नव्हे तर रमजानच्या शेवटच्या दहा दिवसांतील अत्यंत महत्त्वाचा मानला जाणारा ‘इतेकाफ’ (मशिदीत एकांतवासात राहून नमाज आणि कुरआण पठन ) या मुलांनी दोन दिवस मशिदीत बसून पूर्ण केला.
इतक्या लहान वयात कडक उन्हाचा विचार न करता या मुलांनी दाखवलेली धार्मिक निष्ठा पाहून त्यांचे सर्व स्तरातून कौतुक होत आहे. मशिदीतील उपस्थित समाज बांधवांनी आणि नातेवाईकांनी या दोन्ही मुलांच्या जिद्दीचे स्वागत करत त्यांना पुढील आयुष्यासाठी शुभेच्छा दिल्या आहेत.
या चिमुकल्यांच्या भक्तीमुळे परिसरात त्यांचे विशेष कौतुक होत असून, लहान मुलांसाठी हे एक प्रेरणारूप ठरत आहे.