कासार शिरसी प्रतिनिधी :- कासार शिरसी शहरानजीक स्मशानभूमी जवळील ओढ्यावर पुलाचे बांधकाम सुरू असल्यामुळे या मार्गावरील वाहतूक पूर्णपणे विस्कळीत झाली आहे. परिणामी चारचाकी जड वाहने तसेच बससेवा पूर्णपणे बंद पडली आहे. पर्यायी रस्त्याची सोय नसल्यामुळे नागरिकांना मोठ्या अडचणींचा सामना करावा लागत आहे.
दरम्यान, कासार शिरसी–नारंगवाडी मार्गाचे चौपदरीकरण करण्यात येत असून रस्त्याच्या दोन्ही बाजूंना नाली व पुलांचे बांधकाम युद्धपातळीवर सुरू आहे. या कामाबद्दल नागरिक समाधान व्यक्त करत असले, तरी अपूर्ण पर्यायी पानंद रस्त्यामुळे नाराजीही वाढत आहे.
सध्या कासार शिरसी येथून लातूर, तुळजापूर, पुणे, पंढरपूर व मदनसुरीकडे जाणारी बससेवा बंद आहे. बांधकाम सुरू असलेल्या भागालगतचा पानंद रस्ता रखडलेला असल्याने तो तातडीने पूर्ण करून वाहतुकीसाठी खुला करावा, अशी मागणी नागरिकांकडून होत आहे.
शहराच्या सर्वांगीण विकासासाठी परिसरातील सर्व पानंद रस्ते युद्धपातळीवर पूर्ण करणे आवश्यक आहे. मात्र पानंदमुक्त अभियान रखडल्यामुळे नागरिकांमध्ये असमाधानाचे वातावरण निर्माण झाले आहे.
स्मशानभूमी ते चौधरी पाटील-वाघमारे शेत, सोनामाता डोंगर ते निलंगा रोड, जुनी निलंगा गाडीवाट, हत्तरगा रोड ते चिंचनसुरे मळा, बडी बेस उमरगा रोड तसेच रामलिंग मुदगड ते नाकाडा मारुती मार्ग या सर्व रस्त्यांचे काम पानंदमुक्त योजनेअंतर्गत तातडीने पूर्ण करावे, अशी जोरदार मागणी नागरिकांतून होत आहे.