ॲड. दिलीप ठाकूर यांना ‘सामाजिक आयकॉन पुरस्कार’.
नांदेड प्रतिनिधी : सामाजिक क्षेत्रात गेल्या चार दशकांहून अधिक काळ उल्लेखनीय कार्य करणारे धर्मभूषण ॲड. दिलीप ठाकूर यांना ‘सामाजिक आयकॉन पुरस्कार’ प्रदान करण्यात येणार आहे. दि. १५ ऑगस्ट रोजी सकाळी ११.३० वाजता नांदेड येथील कुसुम सभागृहात पालकमंत्री अतुल सावे यांच्या हस्ते हा पुरस्कार प्रदान करण्यात येणार असल्याची माहिती सप्तरंग सेवाभावी संस्थेच्या अध्यक्षा डॉ. सान्वी जेठवाणी यांनी दिली. ॲड. ठाकूर यांना आतापर्यंत देश-विदेशातून ११४ पुरस्कार मिळाले असून, हा त्यांचा ११५वा पुरस्कार ठरणार आहे.
गेल्या २३ वर्षांत ॲड. ठाकूर यांनी गरजूंना २५ लाखांहून अधिक जेवणाचे डबे वितरित केले आहेत. रस्त्यावर राहणाऱ्या बेसहारा व असहाय व्यक्तींसाठी गेल्या ८१ महिन्यांपासून ‘कायापालट’ उपक्रम राबविला जात असून, त्याअंतर्गत केस-दाढी कटिंग, अंघोळ, नवीन कपडे आणि बक्षीस देऊन त्यांना सन्मानाने समाजाच्या मुख्य प्रवाहात आणण्याचा प्रयत्न केला जातो. बेघर नागरिकांना १४ हजारांहून अधिक उबदार चादरी, पावसाळ्यात १४ हजारांहून अधिक छत्र्या आणि ‘चरण सेवा’ उपक्रमातून १४ हजार चप्पलांचे वाटप करण्यात आले आहे.
अन्नाची नासाडी टाळण्यासाठी सहा वर्षांपूर्वी सुरू केलेल्या ‘भाऊचा मानवता फ्रिज’च्या माध्यमातून दररोज गरजू नागरिकांना ४० ते १२० जेवणाचे डबे उपलब्ध करून दिले जातात. यासोबतच धार्मिक, सांस्कृतिक आणि आरोग्यविषयक जनजागृतीसाठी विविध पदयात्रा, अमरनाथ यात्रा, ‘गोदावरी गंगा पूजा’ यांसह अनेक उपक्रम सातत्याने राबविले जात आहेत.
गेल्या ४० वर्षांपासून शालेय साहित्य वाटप, आरोग्य तपासणी शिबिरे व मोफत औषध वाटपाचे कार्य सुरू असून, स्वच्छता अभियान, वृक्षारोपण, क्रीडा, निबंध व वक्तृत्व स्पर्धांसह दरवर्षी ९० हून अधिक उपक्रमांचे आयोजन केले जाते. त्यांच्या या कार्याची दखल घेत आतापर्यंत ११४ पुरस्कारांनी त्यांचा गौरव करण्यात आला आहे.
दरम्यान, सप्तरंग सेवाभावी संस्था व जिल्हा प्रशासन यांच्या संयुक्त विद्यमाने दि. १४ ते १६ ऑगस्टदरम्यान कुसुम सभागृहात ‘सप्तरंग सांस्कृतिक महोत्सव-२०२६’ आयोजित करण्यात आला आहे. या महोत्सवात नृत्य-संगीत स्पर्धा, विविध सांस्कृतिक कार्यक्रम, तृतीयपंथी सशक्तीकरण चर्चासत्र, रोजगार मेळावा आणि मोफत आरोग्य शिबिराचे आयोजन करण्यात आले आहे. यावेळी कला, साहित्य, आरोग्य, समाजसेवा व सांस्कृतिक क्षेत्रातील मान्यवरांचा गौरव करण्यात येणार आहे. ॲड. दिलीप ठाकूर यांच्या ११५व्या पुरस्कार सोहळ्यास हितचिंतकांनी मोठ्या संख्येने उपस्थित राहावे, असे आवाहन अमरनाथ यात्री संघाच्या वतीने करण्यात आले आहे.