परभणी प्रतिनिधी, दि.०७ :- जिल्हा परिषद व पंचायत समिती सार्वत्रिक निवडणुकीकरीता शनिवार, 7 फेब्रुवारी 2026 रोजी मतदान होणार आहे. मतदारांना सकाळी 7.30 ते सांयकाळी 5.30 या कालावधीत मतदान करता येणार आहे. लोकशाहीच्या बळकटीकरणासाठी कोणत्याही प्रलोभनाला बळी न पडता मतदारांनी निर्भयपणे आपल्या मतदानाच अमूल्य हक्क बजवावा, असे आवाहन जिल्हाधिकारी तथा जिल्हा निवडणूक अधिकारी संजयसिंह चव्हाण यांनी केले आहे.
परभणी जिल्हयात एकूण ग्रापंचायती 705 असून जिल्हा परिषदेच्या 54 गट तर पंचायत समितीच्या 108गणांसाठी ही निवडणूक होणार आहे. सेलू तालुक्यात जिल्हा परिषदेचे 5 गट तर पंचयात समितीचे 10 गण आहेत. जिंतूर तालुक्यात 10 गट, 20 गण, मानवत तालुक्यात 4 गट , 8 गण, पाथरी तालुक्यात 5 गट, 10 गण, सोनपेठ तालुक्यात 3 गट, 6 गण, परभणी तालुक्यात 10 गट, 20 गण, गंगाखेड तालुक्यात 7 गट, 14 गण, पालम तालुक्यात 4 गट, 8 गण, तर पूर्णा तालुक्यात 6 गट व 12 गणांसाठी मतदान पार पडणार आहे. मतदान केंद्रांची संख्या 1278 आहे. एकूण मतदारांची संख्या 10 लाख 45 हजार 855 आहे. यामध्ये पुरुष मतदार 5 लाख 42 हजार 937, स्त्री मतदार 5 लाख 2 हजार 913 तर तृत्तीयपंथीय मतदारांची संख्या 5 आहे.
मतदान प्रक्रियेसाठी प्रशासन सज्ज झाले आहे. मतदान केंद्रांवर मतदारांसाठी आवश्यक त्या सुविधा उपलब्ध करुन देण्यात आल्या आहेत. मतदानाच्या पार्श्वभुमीवर कडक सुरक्षा बंदोबस्त तैनात करण्यात आला आहे. मतदानासाठी कामगारांना भरपगारी सुट्टी परभणी, गंगाखेड, मानवत, पाथरी, पुर्णा, सेलु, जिंतुर, सोनपेठ, पालम या जिल्हा परिषद व पंचायत समिती मतदान क्षेत्रातील मतदार असलेले कामगार, अधिकारी, कर्मचारी यांना मग ते कामानिमित्य निवडणुक होणाऱ्या क्षेत्राबाहेर कार्यरत असले तरीही त्यांना निवडणुकीच्या दिवशी मतदानाचा हक्क बजावण्यासाठी भरपगारी सुट्टी देण्यात यावी, असे शासनाने निर्देश दिले आहेत.
हे आदेश मतदारसंघातील सर्व आस्थापना, कारखाने, दुकाने इत्यादींना लागू राहतील. अपवादात्मक परिस्थितीत कामगार, अधिकारी, कर्मचारी इत्यादींना सुट्टी देणे शक्य नसेल तर मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी केवळ दोन ते तीन तासांची सवलत देता येईल. मात्र कोणत्याही परिस्थितीत कामगारांना मतदानासाठी सुट्टी देण्याची दक्षता संबंधित आस्थापना मालकांनी घेणे आवश्यक राहील.
मतदान केंद्रावर मोबाईल वापरण्यास बंदी मतदान प्रक्रिया शांततेत व सुरळीत पार पडावी तसेच मतदान केंद्रावर कोणताही अनुचित प्रकार घडू नये, यासाठी मतदानाच्या दिवशी मतदान केंद्रावर मोबाईल फोन वापरण्यास बंदी घालण्यात आली आहे. मतदारांनी आपले मोबाईल फोन मतदान केंद्रावर आणू नयेत. आठवडी बाजार बंद मतदारांना मतदानाचा हक्क बजावता यावा तसेच मतदान शांततेत पार पाडण्यासाठी परभणी तालुक्यातील वडगाव सुक्रे व टाकळी बोबडे, सेलू तालुक्यातील मौ. ढेगळे पिंपळगाव, पाथरी तालुक्यातील पाथरगव्हाण बु आणि वाघाळा, गंगाखेड तालुक्यातील गंगाखेड शहर (जनावरांचा बाजार) मानवत तालुक्यातील केकरजवळा व गोगलगाव, पालम तालुक्यातील
पालम शहर, सोनपेठ तालुक्यातील शेळगाव म. व शिर्शि बु., जिंतूर तालुक्यातील कावी व आडगाव (बा), पूर्णा तालुक्यातील कात्नेश्वर येथील आठवडी बाजार 7 फेब्रुवारी 2026 रोजी बंद राहणार आहेत. मतमोजणी 9 फेब्रुवारी रोजी सोमवार, दि. 9 फेब्रुवारी रोजी मतमोजणी होणार आहे. तालुकानिहाय मतमोजणीचे केंद्र पुढीलप्रमाणे आहेत. सेलु – तहसील कार्यालय, जिंतूर – औद्योगिक प्रशिक्षण संस्था (आयटीआय), मानवत – तहसील कार्यालय, पाथरी – औद्योगिक प्रशिक्षण संस्था (आयटीआय), सोनपेठ – तहसील कार्यालय, परभणी – वसंतराव नाईक मराठवाडा कृषी अभियांत्रिकी महाविद्यालय, गंगाखेड – नवीन उपविभागीय अधिकारी कार्यालय, पालम – तहसील कार्यालय, पूर्णा – तहसील कार्यालय.