नांदेड प्रतिनिधी :- अवैध व्यवसायांना पायबंद घालण्यासाठी नांदेड परिक्षेत्रातील विशेष पथकाने मोठी कारवाई करत सुमारे ५२ लाख रुपयांचे चंदन व संबंधित साहित्य जप्त केले आहे. लातूरकडून मध्यप्रदेशातील बुऱ्हाणपूरकडे चंदन वाहतूक होणार असल्याची माहिती मिळाल्यानंतर ही कारवाई करण्यात आली.
दिनांक ५ एप्रिल २०२६ रोजी पहाटे, नांदेड जिल्ह्यातील लोहा पोलीस ठाण्याच्या हद्दीत नांदेड रोडवरील साई हॉटेलजवळ संशयित आयशर वाहन अडवण्यात आले. वाहनाची तपासणी केली असता सुरुवातीला ते रिकामे दिसले, मात्र ड्रायव्हर केबिनच्या मागे गुप्त कप्पा तयार करून त्यात चंदन लपवून ठेवलेले आढळले.
त्या कप्प्यातून चंदनाने भरलेल्या गोण्या बाहेर काढून त्यांचे वजन केले असता एकूण १,४७० किलो चंदन (किंमत अंदाजे ३६.७५ लाख रुपये) जप्त करण्यात आले. याशिवाय आयशर वाहन व रोख रक्कम असा एकूण ५१.९६ लाख रुपयांचा मुद्देमाल पोलिसांनी जप्त केला.
या प्रकरणी चालक तौफीक चांदपाशा देशमुख (रा. चापोली, ता. चाकूर), तुकाराम शेखराव बुंदळे (रा. आनंदवाडी), रामदास शेखराव बुंदळे (रा. आनंदवाडी), बालासाहेब जाधव (रा. केज, जि. बीड) व शंकर तानाजी माने (रा. चाकूर) यांच्याविरुद्ध गुन्हा दाखल करण्यात आला आहे.
भारतीय दंड संहितेच्या कलम ३०३(२), ३(५) तसेच भारतीय वन अधिनियम आणि वृक्षतोड प्रतिबंधक कायद्यान्वये कारवाई करण्यात आली असून पुढील तपास पोलीस ठाणे लोहा येथील अधिकाऱ्यांकडून सुरू आहे.
या कारवाईत पोलीस उपनिरीक्षक पंकज इंगळे यांच्यासह पथकातील कर्मचारी सहभागी होते. पोलीस उपमहानिरीक्षक श्री. शहाजी उमाप यांनी पथकाच्या कार्याचे कौतुक केले आहे.
‘खबर’ हेल्पलाईनचा वापर करा
अवैध व्यवसायांविषयी माहिती देण्यासाठी पोलीस प्रशासनाने ‘खबर’ हेल्पलाईन (९१ ५० १०० १००) सुरू केली आहे. नागरिकांनी आपल्या परिसरातील अवैध हालचालींची माहिती या क्रमांकावर फोन किंवा व्हॉट्सअॅपद्वारे देण्याचे आवाहन करण्यात आले आहे.