जागतिक योग दिनानिमित्त भाजपा नांदेड महानगरचे भव्य योग शिबिर; 500 हून अधिक योगसाधकांचा सहभाग.
नांदेड प्रतिनिधी : जागतिक योग दिनानिमित्त भाजपा नांदेड महानगरच्या वतीने श्री गुरु ग्रंथ साहिबजी भवन येथे भव्य योग शिबिराचे आयोजन करण्यात आले. भाजपा नांदेड महानगरचे अध्यक्ष अमरनाथ राजुरकर यांच्या पुढाकाराने आयोजित या शिबिराचे उद्घाटन आमदार श्रीजया चव्हाण यांच्या हस्ते झाले. यावेळी माजी पालकमंत्री डी. पी. सावंत, विशेष पोलीस निरीक्षक शहाजी उमाप, स्थायी समिती सभापती वीरेंद्रसिंह गाडीवाले, प्रवीण साले यांच्यासह अनेक मान्यवर उपस्थित होते.
या शिबिरात 500 हून अधिक योगसाधकांनी सहभाग नोंदवून योगाभ्यासाचा लाभ घेतला. कार्यक्रमाचे प्रास्ताविक महानगर योग संयोजक धर्मभूषण ॲड. दिलीप ठाकूर यांनी केले. त्यांनी योग ही केवळ व्यायामपद्धती नसून शरीर, मन आणि आत्म्याचा समतोल साधणारी जीवनशैली असल्याचे सांगितले. तसेच पंतप्रधान नरेंद्र मोदी यांच्या पुढाकारामुळे योगाला जागतिक स्तरावर अभूतपूर्व मान्यता मिळाल्याचे त्यांनी नमूद केले.
पतंजली योग समितीचे जिल्हाध्यक्ष सुरेश लंगडापुरे यांनी उपस्थितांना विविध योगासने, प्राणायाम, सूर्यनमस्कार आणि योगाचे आरोग्यदायी फायदे याविषयी मार्गदर्शन केले. त्यांच्या मार्गदर्शनाखाली उपस्थितांनी विविध योगप्रकारांचा सराव केला.
कार्यक्रमात नगरसेविका शांभवी साले, शितल खांडील, सुषमा थोरात, पंढरीनाथ कंठेवाड, नागेश शेट्टी, सुभाष देवकते, रामकृष्ण चक्रवार, राजश्री हुरने, प्रकाश उंटवाले, सरदार गुरुबचनसिंघ, राम शेळके, उर्मिला साजणे आणि जी. नागय्या यांचा शाल व मोत्याची माळ देऊन सत्कार करण्यात आला.
अमरनाथ यात्री संघ, पतंजली परिवार, आर्ट ऑफ लिव्हिंग, हॅपी बीसी ग्रुप, मॉर्निंग वॉक ग्रुप, विविध शैक्षणिक संस्था, विश्व हिंदू परिषद, लायन्स परिवार तसेच भाजपा कार्यकर्त्यांनी मोठ्या संख्येने सहभाग घेतला. महिला, युवक, ज्येष्ठ नागरिक आणि विद्यार्थ्यांनी उत्साहाने योगाभ्यास केला.
कार्यक्रमस्थळी उभारण्यात आलेले भव्य व्यासपीठ, एलईडी स्क्रीनवरील थेट प्रक्षेपण, अत्याधुनिक ध्वनिक्षेपक व्यवस्था तसेच सहभागींसाठी अल्पोपहार व पिण्याच्या पाण्याची सुविधा यामुळे कार्यक्रम अत्यंत शिस्तबद्ध आणि यशस्वीरीत्या पार पडला.
शिबिराच्या यशस्वी आयोजनासाठी युवा मोर्चा अध्यक्ष क्षीरसागर यांच्यासह अनेक पदाधिकारी व कार्यकर्त्यांनी विशेष परिश्रम घेतले. यावेळी 24 जून रोजी श्रीराम सेतू, गोवर्धन घाट येथे आयोजित करण्यात आलेल्या 27 व्या भव्य चालण्याच्या स्पर्धेत सहभागी होण्याचे आवाहनही करण्यात आले.
भाजपा नांदेड महानगरच्या वतीने गेल्या 12 वर्षांपासून सातत्याने जागतिक योग दिनानिमित्त योग शिबिराचे आयोजन करण्यात येत असून, यंदाही नागरिकांचा उत्स्फूर्त प्रतिसाद लाभल्याने आयोजकांनी समाधान व्यक्त केले.