नांदेड जिल्ह्यातील देगलूर शहरात ‘नमो उद्यान’ उभारणीच्या मागणीला वेग.
देगलूर प्रतिनिधी धनाजी जोशी:
नांदेड जिल्ह्यातील देगलूर शहरात पंतप्रधान नरेंद्र मोदी यांच्या नावाने ‘नमो उद्यान’ उभारण्याची मागणी आता पुन्हा एकदा पुढे आली आहे. या संदर्भात सामाजिक कार्यकर्ते धनाजी जोशी यांनी नगर विकास विभागाकडे ई-मेलद्वारे निवेदन सादर केले असून, त्याची दखल घेत नगर विकास विभागाने संबंधित प्रस्ताव पुढील कार्यवाहीसाठी पाठविल्याचे पत्रव्यवहारातून दिसून येते.
धनाजी जोशी यांनी आपल्या निवेदनात नमूद केले आहे की, पंतप्रधान नरेंद्र मोदी यांच्या जन्मदिनानिमित्त देशभर विविध विकासकामे राबविण्यात येतात. त्याच अनुषंगाने देगलूर शहरातील बी.टी. कॉलेज परिसरातील मोकळ्या जागेत ‘नमो उद्यान’ उभारण्यात यावे, अशी मागणी त्यांनी केली आहे.
नगर विकास विभागाकडून हा ई-मेल संबंधित अधिकाऱ्यांकडे आवश्यक कार्यवाहीसाठी अग्रेषित (Forward) करण्यात आला असून, त्यावर वरिष्ठ अधिकाऱ्यांच्या नोंदीदेखील करण्यात आल्या आहेत. त्यामुळे या मागणीबाबत प्रशासकीय स्तरावर प्रक्रिया सुरू झाल्याचे संकेत मिळत आहेत. मात्र, उद्यान उभारणीस अद्याप अंतिम मंजुरी मिळालेली नाही.
देगलूर शहरातील नागरिकांसाठी आधुनिक सुविधा असलेले उद्यान उभारण्यात आल्यास परिसराच्या सौंदर्यात भर पडेल तसेच नागरिकांना विरंगुळ्यासाठी एक उत्तम सार्वजनिक जागा उपलब्ध होईल, अशी अपेक्षा व्यक्त केली जात आहे.