विद्यार्थ्यांमध्ये अवांतर वाचनाची गोडी रुजविण्याची गरज — डॉ. सुरेंद्र आलूरकर
देगलूर प्रतिनिधी : शाळा-महाविद्यालयांतील विद्यार्थ्यांनी अभ्यासक्रमातील पुस्तकांच्या वाचनासोबतच व्यक्तिमत्त्व विकासासाठी अवांतर वाचनाची आवड जोपासणे आवश्यक आहे, असे प्रतिपादन बालरोगतज्ज्ञ तथा श्री समर्थ वाचनालयाचे सदस्य डॉ. सुरेंद्र आलूरकर यांनी केले.
श्री समर्थ वाचनालय आणि देगलूर महाविद्यालय यांच्या संयुक्त विद्यमाने वाचन प्रेरणा दिनानिमित्त आयोजित ग्रंथप्रदर्शनाच्या उद्घाटनप्रसंगी ते बोलत होते. यावेळी वाचनालयाचे कार्यवाह अविनाश देशपांडे हसनाळकर, डॉ. अमोल बामणे आणि देगलूर महाविद्यालयाचे ग्रंथपाल डॉ. साईनाथ शिंदे उपस्थित होते.
कार्यक्रमाच्या प्रारंभी भारताचे ज्येष्ठ शास्त्रज्ञ आणि माजी राष्ट्रपती भारतरत्न डॉ. ए. पी. जे. अब्दुल कलाम यांच्या प्रतिमेचे पूजन करण्यात आले. त्यानंतर डॉ. सुरेंद्र आलूरकर यांच्या हस्ते ग्रंथप्रदर्शनाचे उद्घाटन करण्यात आले. यावेळी उपस्थित मान्यवरांचा सत्कार करण्यात आला.
विद्यार्थ्यांमध्ये वाचनाची आवड निर्माण व्हावी, या उद्देशाने वाचन प्रेरणा दिनाचे आयोजन करण्यात येते. अभ्यासक्रमाबरोबरच अवांतर वाचनालाही महत्त्व देणे गरजेचे आहे, असे डॉ. आलूरकर यांनी सांगितले. पूर्वी शिक्षक विद्यार्थ्यांना महत्त्वाच्या कादंबऱ्या आणि कथासंग्रह आवर्जून वाचायला सांगत असत. अवांतर वाचनामुळे व्यक्तिमत्त्वात सकारात्मक बदल घडतात, असेही त्यांनी नमूद केले.
यावेळी मानव विकास विद्यालयाचे मुख्याध्यापक एस. ए. कोल्हे, वाचनकट्टा उपक्रम राबविणारे डॉ. अमोल बामणे आणि ग्रंथपाल डॉ. साईनाथ शिंदे यांनीही वाचन प्रेरणा दिनानिमित्त आपले मनोगत व्यक्त केले. विद्यार्थ्यांनी नियमित वाचनाची सवय लावून ज्ञानाच्या कक्षा रुंदावाव्यात, असे आवाहन मान्यवरांनी केले.
कार्यक्रमाचे सूत्रसंचालन व आभार प्रदर्शन प्रा. महेश कुडलीकर यांनी केले.
यावेळी देगलूर नगर परिषदेच्या उपमुख्याधिकारी स्वाती वाकोडे, शीला भालेराव, डॉ. क्यादरे, रेवनाथ पाटील खरगकर, एस. जी. वाघमारे, रमेश कुलकर्णी, मा. बा. नरंगलकर, श्री समर्थ वाचनालयाचे कर्मचारी दत्ता अमृतवाड, सुमित मानेकर, विठ्ठल पुठेठवाड यांच्यासह अनेक वाचक उपस्थित होते.