नांदेड प्रतिनिधी: जिल्ह्यातील गुन्हेगारीला आळा घालण्यासाठी नांदेड पोलिसांकडून सराईत व वारंवार गंभीर गुन्हे करणाऱ्या आरोपींविरोधात कठोर कारवाई सुरू आहे. याच मोहिमेअंतर्गत वजीराबाद परिसरातील सराईत गुन्हेगार किशन राजू कुरिल याच्यावर MPDA कायद्यान्वये कारवाई करून एक वर्षासाठी स्थानबद्ध करण्यात आले आहे.
पोलीस नोंदीनुसार, किशन कुरिल याच्याविरुद्ध खून, खंडणी मागणे, खुनाचा प्रयत्न, अवैध शस्त्र बाळगणे व वापरणे, गंभीर दुखापत करणे, लूट व दरोडा यांसारखे गंभीर गुन्हे दाखल आहेत. यापूर्वीही त्याच्यावर प्रतिबंधात्मक कारवाई करण्यात आली होती; मात्र त्याच्या वर्तनात सुधारणा झाली नाही.
यानंतर वजीराबाद पोलीस ठाण्याच्या वतीने MPDA अंतर्गत स्थानबद्धतेचा प्रस्ताव पोलीस अधीक्षक डॉ. नीलाभ रोहन यांच्याकडे सादर करण्यात आला. पोलीस अधीक्षकांनी जिल्हाधिकारी तथा जिल्हादंडाधिकारी राहुल कर्डिले यांच्याकडे त्याला एक वर्षासाठी स्थानबद्ध करण्याची शिफारस केली.
२५ ऑगस्ट २०२६ रोजी जिल्हाधिकारी राहुल कर्डिले यांनी MPDA कायद्यानुसार किशन कुरिल याला मध्यवर्ती कारागृह, छत्रपती संभाजीनगर येथे एक वर्षासाठी स्थानबद्ध करण्याचे आदेश दिले. आदेशानंतर पोलिसांनी त्याला ताब्यात घेऊन कारागृहात दाखल केले.
पोलिसांच्या माहितीनुसार, २०२६ मध्ये आतापर्यंत नांदेड जिल्ह्यात १६ सराईत गुन्हेगारांवर स्थानबद्धतेची कारवाई करण्यात आली असून, १५० हून अधिक सराईत गुन्हेगारांविरुद्ध विविध कायद्यांतर्गत प्रतिबंधात्मक कारवाई प्रस्तावित करण्यात आली आहे. सार्वजनिक शांतता व कायदा-सुव्यवस्थेला बाधा आणणाऱ्या गुन्हेगारांविरुद्ध यापुढेही कठोर कारवाई सुरूच राहणार असल्याचे पोलिसांनी स्पष्ट केले.