ఎస్ఎన్ పురంలో ఘనంగా 80వ స్వాతంత్ర్య దినోత్సవ వేడుకలు.
వర్ణి ప్రతినిధి చందర్: నిజామాబాద్ జిల్లా వర్ణి మండలంలోని ఎస్ఎన్ పురం గ్రామపంచాయతీ ప్రభుత్వ సముదాయంలో 80వ స్వాతంత్ర్య దినోత్సవ వేడుకలను శనివారం ఘనంగా నిర్వహించారు. ఈ సందర్భంగా జాతీయ జెండాను ఆవిష్కరించి జాతీయ గీతాన్ని ఆలపించారు. అనంతరం స్వాతంత్ర్య సమరయోధుల త్యాగాలను స్మరించుకుంటూ వారికి ఘన నివాళులు అర్పించారు.
“అహింసే మన పథం.. మహనీయుల త్యాగాలే మనకు స్ఫూర్తి” అనే సందేశంతో కార్యక్రమం కొనసాగింది. దేశానికి స్వాతంత్ర్యం సాధించేందుకు మహనీయులు చేసిన అలుపెరుగని పోరాటం, చేసిన త్యాగాల ఫలితంగానే నేడు భారతదేశం ప్రపంచంలో గర్వించదగిన స్థాయిలో ముందుకు సాగుతోందని ఈ సందర్భంగా పేర్కొన్నారు.
స్వాతంత్ర్య సమరయోధుల ఆశయాలను నేటి తరానికి అందిస్తూ, వారి స్ఫూర్తితో దేశాభివృద్ధిలో ప్రతి ఒక్కరూ భాగస్వాములు కావాలని పిలుపునిచ్చారు. దేశ సమగ్రత, ఐక్యత, శాంతి, అభివృద్ధి కోసం ప్రజలంతా బాధ్యతాయుతంగా వ్యవహరించాలని సూచించారు. గ్రామాభివృద్ధితో పాటు దేశాభివృద్ధికి ప్రతి ఒక్కరూ తమ వంతు కృషి చేయాలని కోరారు.
అనంతరం గ్రామ ప్రజలకు 80వ స్వాతంత్ర్య దినోత్సవ శుభాకాంక్షలు తెలిపారు. ఈ వేడుకల్లో అధికారులు, ప్రజాప్రతినిధులు, గ్రామ పెద్దలు, యువత, మహిళలు, విద్యార్థులు, గ్రామ ప్రజలు పెద్ద సంఖ్యలో పాల్గొని కార్యక్రమాన్ని విజయవంతం చేశారు.