घुंगराळा प्रतिनिधी,दि.२० :- कुंटुर प्राथमिक आरोग्य केंद्रा अंतर्गत येणाऱ्या घुंगराळा येथील आरोग्य उपकेंद्रात अपुऱ्या औषधी असल्याने नागरिकांना बाहेरुन औषधी विकत घ्यावी लागत आहे. यामुळे गोरगरीब रुग्णांचे हाल होत आहेत.
घुंगराळा गावा लगत १० ते १२ गावांचा संबंध येतो. घुंगराळा हे गाव हायवेवर असल्यामुळे ग्रामीण भागातून येणाऱ्या लोकांचा कल घुंगराळा येथील आरोग्यवर्धिनी केंद्राकडे असतो. आजच्या महागाईच्या काळात सर्वसामान्य गरजूंना आरोग्य केंद्राशिवाय पर्याय नसतो, पण घुंगराळा येथील आरोग्य उपकेंद्रातील शेख मॅडम हे नांदेड येथून ये जा करत असतात, स्थानिकांना काही तात्काळ अडचण आल्यास मॅडम येईपर्यंत वाट पाहत बसावे लागते.
तसेच औषधींचा साठा खूप दिवसांपासून उपकेंद्रात उपलब्ध नाही, गरोदर मातांना आवश्यक असलेले टीटीचे इंजेक्शन उपलब्ध नाही, रुग्णांना अशक्तपणा किंवा अचानक चक्कर आल्यास ग्लुकोज डी चे पावडर उपलब्ध नाही, माता व बालक संरक्षण कार्ड उपलब्ध नाही, बाहेरुन झेरॉक्स कडून आणण्यास सांगत आहेत. या होणाऱ्या गैरसोयी मुळे रुग्णांना विनाकारण मानसिक त्रास सोसावा लागत आहे.
वरिष्ठ अधिकारी यांचे घुंगराळा उपकेंद्राकडे पूर्ण दुर्लक्ष होत आहे. जिल्हा आरोग्य अधिकारी यांना संपर्क करुन पण फोन उचलण्यास ते तयार नाहीत. वरिष्ठ वैद्यकीय अधिकारी यांनी उपकेंद्र घुंगराळा येथे लक्ष देऊन औषधी पुरवठा सुरळीत करण्यात यावा. रुग्णांची गैरसोय होणार नाही याची काळजी घ्यावी अशी मागणी केली जात आहे.
