नांदेड, दि. २९ ऑगस्ट :
गंभीर स्वरूपाचे खून, बलात्कार, अपघात तसेच इतर गंभीर गुन्ह्यांमध्ये आरोपींविरुद्ध ठोस पुरावे न्यायालयात सादर करण्यासाठी फॉरेन्सिक तपास महत्त्वाचा मानला जातो. यासाठी राज्य सरकारच्या निर्णयानुसार नांदेड येथे आजपासून ‘मोबाइल फॉरेन्सिक लॅब’ कार्यान्वित करण्यात आली आहे.
उपविभागीय पोलिस अधिकारी कार्यालयात झालेल्या कार्यक्रमात पोलिस उपमहानिरीक्षक श्री. शाहाजी उमबरे (नांदेड परिक्षेत्र) आणि पोलिस अधीक्षक म.श्री. अविनाश कुमार (नांदेड) यांच्या हस्ते हिरवी झेंडी दाखवून या लॅबचे उद्घाटन करण्यात आले.
या लॅबमध्ये अत्याधुनिक साधनसामग्री, डी.एन.ए. व रक्त नमुने तपासणीसाठी किट्स, डिजिटल पुरावे संकलनासाठी उपकरणे तसेच वैज्ञानिक अधिकारी व सहाय्यक अधिकारी यांची नियुक्ती करण्यात आली आहे. ही लॅब २४ तास उपलब्ध राहणार आहे.
मोबाइल फॉरेन्सिक लॅबमुळे घटनास्थळीच त्वरित तपास सुरू होऊन प्राथमिक निष्कर्ष मिळणार आहेत. त्यामुळे तपास प्रक्रियेत गती येऊन न्यायालयीन कारवाईसाठी ठोस पुरावे सादर करता येणार आहेत.