नांदेड प्रतिनिधि,दि. ११ सप्टेंबर :– राष्ट्रीय अन्न सुरक्षा व पोषण अभियान, राष्ट्रीय खाद्यतेल अभियान आणि राष्ट्रीय कृषि विकास महाराष्ट्र मिलेट मिशन योजनेंतर्गत रब्बी हंगामात गहू, हरभरा, ज्वारी, करडई व सुर्यफुल या पिकांची उत्पादकता वाढविण्यासाठी पीक प्रात्यक्षिक कार्यक्रम राबविण्यात येत आहे. या माध्यमातून शेतकऱ्यांपर्यंत आधुनिक तंत्रज्ञान पोहोचविण्याचे उद्दिष्ट आहे.
या कार्यक्रमासाठी ३१ मार्च २०२४ पूर्वी कोणत्याही शासकीय यंत्रणेकडे नोंदणीकृत शेतकरी गट, शेतकरी उत्पादक कंपनी तसेच कृषी क्षेत्रात कार्यरत सहकारी संस्था पात्र आहेत. गटाने प्राधिकृत सदस्यामार्फत महाडीबीटी प्रणालीवर अर्ज करावा. ही सुविधा २ सप्टेंबर २०२५ पासून उपलब्ध झाली आहे. संकेतस्थळावर ‘बियाणे वितरण फलेक्सी घटक’ या टाईल अंतर्गत औषधे, खते व इतर घटकांसाठी अर्ज करण्याची सोय करण्यात आली आहे.
शेतकरी गट, उत्पादक कंपन्या आणि सहकारी संस्था यांनी या योजनेचा लाभ घ्यावा. अधिक माहितीसाठी गावचे सहाय्यक कृषी अधिकारी, उपकृषि अधिकारी, मंडळ कृषी अधिकारी, तालुका कृषी अधिकारी तसेच उपविभागीय कृषी अधिकारी यांच्याशी संपर्क साधावा, असे आवाहन जिल्हा अधीक्षक कृषी अधिकारी दत्तकुमार कळसाईत यांनी केले आहे.