नांदेड प्रतिनिधी दि.१३ :- एज्युटेक बिझनेस अकॅडमी, पुणे यांच्या विद्यमाने आयोजित राष्ट्र्रीय शिक्षणक्रांती अभियान व सह रोजगार मेळावा मंगळवार, दि. १६ डिसेंबर २०२५ रोजी दुपारी २ वाजता गायन–वादन विद्यालयाचे सभागृह, कलामंदिर जवळ, नांदेड येथे मोठ्या उत्साहात आयोजित करण्यात येणार आहे, अशी माहिती संयोजक धर्मभूषण ॲड. दिलीप ठाकूर यांनी दिली.
एज्युटेकचे मुख्य व्यवस्थापकीय संचालक (CMD) निलेश खेडेकर व नॅशनल डायरेक्टर विनायक शिरोळे यांच्या मार्गदर्शनाखाली हा उपक्रम राबविण्यात येत असून, यावेळी प्रादेशिक संचालक ज्ञानेश्वर सोळंके, संचालक संतोष पाटील तसेच सुभाष बल्लमखाने यांचे उपस्थितांना मार्गदर्शन लाभणार आहे. शिक्षण क्षेत्रातील बदलते प्रवाह, आधुनिक तंत्रज्ञानाधिष्ठित अभ्यासक्रम आणि रोजगाराशी थेट जोडलेली शिक्षणप्रणाली यावर मान्यवर सविस्तर मार्गदर्शन करणार आहेत.
या अभियानाचा मुख्य उद्देश शहरी व ग्रामीण भागातील गरजू, होतकरू आणि आर्थिकदृष्ट्या मागास विद्यार्थ्यांना कमी खर्चात गुणवत्तापूर्ण, कौशल्याधिष्ठित व रोजगाराभिमुख शिक्षण उपलब्ध करून देणे हा आहे. वाढत्या शैक्षणिक खर्चामुळे अनेक विद्यार्थ्यांचे शिक्षण अर्धवट राहते; ही स्थिती बदलण्यासाठी किमान खर्चात उच्च दर्जाचे शिक्षण देण्यावर विशेष भर देण्यात आला आहे.
यासोबतच वाढत्या बेरोजगारीवर उपाय म्हणून सह रोजगार मेळाव्याचे आयोजन करण्यात आले आहे. या मेळाव्यातून युवकांना नोकरीच्या संधी, स्वयंरोजगार मार्गदर्शन, कौशल्यविकास प्रशिक्षण, उद्योगसृष्टीशी थेट संपर्क तसेच करिअर नियोजनाची माहिती दिली जाणार आहे. विविध क्षेत्रांतील रोजगार संधी व उद्योजकतेसाठी आवश्यक प्रशिक्षणामुळे युवकांचा आत्मविश्वास वाढेल, असा विश्वास आयोजकांनी व्यक्त केला आहे.
या घोषणेनंतर नांदेड जिल्ह्यासह परिसरातील युवक, विद्यार्थी व पालकांमध्ये मोठी उत्सुकता निर्माण झाली आहे. शिक्षण, कौशल्य व रोजगाराचे सक्षम एकत्रीकरण साधत गरजू युवकांना संधी उपलब्ध करून देण्याचा ठाम निर्धार या अभियानातून व्यक्त करण्यात आला आहे.
तरी बेरोजगार युवकांनी, करिअरच्या शोधात असलेल्या विद्यार्थ्यांनी तसेच पालकांनी या सुवर्णसंधीचा लाभ घ्यावा, असे आवाहन संयोजक धर्मभूषण ॲड. दिलीप ठाकूर यांनी केले आहे.