नांदेड प्रतिनिधी दि.०३ :- माजी मुख्यमंत्री अशोकराव चव्हाण, खासदार डॉ. अजित गोपछडे तसेच महानगराध्यक्ष अमर राजूरकर यांच्या शिफारशीनुसार भारतीय जनता पक्ष प्रदेशाध्यक्ष आ. रवींद्र चव्हाण यांनी खास बाब म्हणून धर्मभूषण ॲड. दिलीप ठाकूर यांना नांदेड महानगर जिल्हा सरचिटणीस पदाची मान्यता दिली आहे. दिलीप ठाकूर यांना या नियुक्तीचे लेखी पत्र प्राप्त झाल्यानंतर सर्व स्तरांतून त्यांचे अभिनंदन करण्यात येत आहे.
भाजपच्या वतीने वर्षभरात सुमारे ९० समाजोपयोगी व संघटनात्मक उपक्रम राबवणारे ॲड. दिलीप ठाकूर यांना यावेळी भाजपची अधिकृत उमेदवारी मिळाली नव्हती. त्यामुळे त्यांनी प्रभाग क्रमांक १६ मधून, तर त्यांच्या पत्नी व माजी नगरसेविका जयश्री ठाकूर यांनी प्रभाग क्रमांक १७ मधून भाजप तर्फे भरलेला अर्ज बी फॉर्म अभावी अपक्ष अर्ज ठरला होता. या दोन्ही प्रभागांत ठाकूर दाम्पत्याच्या उमेदवारीमुळे भाजपच्या पॅनलचे संभाव्य नुकसान होण्याची शक्यता निर्माण झाली होती.
ही बाब तातडीची असल्याने भाजपच्या वरिष्ठ नेत्यांनी पक्षसंघटनात्मक तोडगा काढण्याच्या दृष्टीने नवे जिल्हा सरचिटणीस पद भरण्याची परवानगी वरिष्ठ पातळीवर मागितली. ॲड. दिलीप ठाकूर यांनी यापूर्वी तब्बल आठ वर्षे जिल्हा सरचिटणीस पद अत्यंत कर्तव्यदक्षपणे सांभाळले असल्याचा अनुभव लक्षात घेऊन प्रदेशाध्यक्षांनी या पदासाठी संमती दर्शवली.
माजी मुख्यमंत्री अशोकराव चव्हाण यांच्या हस्ते दिलीप ठाकूर यांना लेखी नियुक्ती पत्र प्रदान करण्यात आल्यानंतर, दिलीप ठाकूर व त्यांच्या पत्नी जयश्री ठाकूर यांनी आपापले उमेदवारी अर्ज अधिकृतपणे माघारी घेतले. त्यामुळे प्रभाग क्रमांक १६ व १७ मधील भाजपच्या पॅनलचा विजयाचा मार्ग सुकर झाला असल्याची प्रतिक्रिया भाजप वर्तुळातून व्यक्त होत आहे.
दिलीप ठाकूर यांची जिल्हा सरचिटणीसपदी नियुक्ती झाल्याबद्दल माजी पालकमंत्री डी. पी. सावंत, ग्रामीण जिल्हाध्यक्ष डॉ. संतुकराव हंबर्डे, प्रदेश कार्यकारिणी सदस्य ॲड. चैतन्यबापू देशमुख,माजी महानगराध्यक्ष प्रवीण साले, जिल्हा सरचिटणीस शीतल खांडील यांच्यासह अनेक पदाधिकारी, कार्यकर्ते व समर्थकांनी त्यांचे अभिनंदन केले आहे.