गडचिरोली प्रतिनिधी,दि. २६ :- भारत निवडणूक आयोगाच्या स्थापना दिनानिमित्त २५ जानेवारी २०२६ रोजी १६ वा राष्ट्रीय मतदार दिन कार्यक्रम जिल्हा नियोजन समिती सभागृह, जिल्हाधिकारी कार्यालय, गडचिरोली येथे उत्साहात पार पडला. कार्यक्रमाच्या अध्यक्षस्थानी अपर जिल्हाधिकारी नितिन गावंडे होते. युवा मतदारांचा मतदान प्रक्रियेत सहभाग वाढावा व लोकशाही अधिक बळकट व्हावी, असे आवाहन श्री. नितिन गावंडे यांनी केले.
यावेळी प्रभारी उप जिल्हा निवडणूक अधिकारी संतोष आष्टीकर, तहसीलदार सागर कांबळे, नायब तहसीलदार ज्ञानेश्वर ठाकरे व शाहीद शेख यांच्यासह शासकीय औद्योगिक संस्था, गडचिरोली येथील शिक्षक व विद्यार्थी, मतदान केंद्रस्तरीय अधिकारी तसेच इतर कर्मचारी मोठ्या संख्येने उपस्थित होते.
१६ व्या राष्ट्रीय मतदार दिनासाठी भारत निवडणूक आयोगाने दिलेल्या “My India My Vote” या विषयावर आधारित कार्यक्रमात मतदारांना मतदानाबाबत शपथ देण्यात आली. निवडणूक विषयक जनजागृतीसाठी शाळा व महाविद्यालय स्तरावर आयोजित चित्रकला, रांगोळी व निबंध स्पर्धांतील प्रथम तीन क्रमांकाच्या विद्यार्थ्यांचा मान्यवरांच्या हस्ते सत्कार करण्यात आला. तसेच १८ वर्षे पूर्ण केलेल्या नवमतदारांना मतदान ओळखपत्रांचे वितरण करण्यात आले. कार्यक्रमाचे प्रास्ताविक तहसीलदार सागर कांबळे यांनी केले.