नांदेड प्रतिनिधी दि.०४ :- भारतीयांवर असलेला लेटलेटीफचा शिक्का पुसण्यासाठी “ कुबेरनगरी मौजे लोंढेसांगवी प्रस्तुत नरेंद्र देवेंद्र महोत्सव २०२६ ” मध्ये वेळेवर उपस्थित राहणाऱ्या रसिकांना भाजपा कामगार आघाडी जिल्हाध्यक्ष सुरेश लोट यांच्या तर्फे दहा कलर टी.व्ही. देण्यात येणार आहेत, अशी माहिती स्वागताध्यक्ष शिवप्रसाद राठी व महोत्सवाचे संयोजक धर्मभूषण अॅड. दिलीप ठाकूर यांनी दिली.
कै. चंद्रभागा केरबा गंजेवार नगरी, नवा मोंढा मैदान, नांदेड येथे होणाऱ्या “कुबेरनगरी मौजे लोंढेसांगवी प्रस्तुत नरेंद्र देवेंद्र महोत्सवात ” एकवीस फेब्रुवारी रोजी पहिल्या दिवशी चौदावा मराठी हास्य दरबार भरविण्यात येणार आहे. या हास्य दरबारात स्टँडअप कॉमेडीचे बादशहा बंडा जोशी, झी हास्य सम्राट सिद्धार्थ खिल्लारे तसेच लोकप्रिय शाहीर रमेश गिरी हे आपल्या विनोदी सादरीकरणातून रसिकांचे भरभरून मनोरंजन करणार आहेत. तसेच चला हवा येऊ दे फेम सतीश कासेवार यांचा खास महिलांसाठी होम मिनिस्टर – खेळ पैठणीचा हा मजेशीर कार्यक्रम घेण्यात येणार आहे.
याच दिवशी रमेश पारसेवार, अॅड. गजानन पिंपरखेडे, रत्नाकर वाघमारे व गंगाप्रसाद तोष्णीवाल यांना नांदेड भूषण पुरस्कार देऊन सन्मानित करण्यात येणार आहे. तर सुधाकर पत्रभूषण पुरस्कार प्राप्त मान्यवरांमध्ये पन्नालाल शर्मा, अभय कुळकजाईकर, चारुदत्त चौधरी, संतोष पांडागळे व रामेश्वर काकडे यांचा समावेश आहे.
बावीस फेब्रुवारी रोजी महोत्सवाच्या दुसऱ्या दिवशी चोवीसावे अखिल भारतीय विराट कविसंमेलन आयोजित करण्यात आले आहे. या कविसंमेलनात मेरठ (उत्तर प्रदेश) येथील हास्य संचालक व क्रांती कवी सौरभ जैन सुमन, जबलपूर (मध्य प्रदेश) येथील हास्य गीतकार सुदीप भोला, भिलवाडा (राजस्थान) येथील हास्य व्यंग्य कवी दीपक पारेख, मैनपुरी (उत्तर प्रदेश) येथील वीर रस कवी डॉ. मनोज चौहान, सुरत (गुजरात) येथील शृंगार रसाच्या कवयित्री सोनल जैन तसेच दिल्लीच्या वीर रस कवयित्री नेहा शर्मा ‘नमन’ यांचा सहभाग असणार आहे. याच कार्यक्रमात माजी मुख्यमंत्री अशोकराव चव्हाण यांना नांदेड भूषण पुरस्काराने गौरविण्यात येणार आहे.
कुबेरनगरी मौजे लोंढेसांगवी प्रस्तुत नरेंद्र देवेंद्र महोत्सवाच्या प्रत्येक दिवशी सायंकाळी ठीक पाच वाजता कार्यक्रमस्थळी उपस्थित असलेल्या रसिकांमधून सोडतीद्वारे दररोज पाच कलर टी.व्ही., असे एकूण दहा कलर टी.व्ही. वितरित करण्यात येणार आहेत. या सोडतीमध्ये पत्रकारांनाही सहभागी करून घेण्यात येणार आहे. रसिकांनी कार्यक्रम सुरू होण्यापूर्वी प्रवेशद्वारावर उपस्थित स्वयंसेवकांकडून शिक्का मारूनच मैदानात प्रवेश करावा, असे आवाहन आयोजन समितीच्या वतीने करण्यात आले आहे.