देगलूर प्रतिनिधी,दि.०५:- प्रभाग क्र. १ व २ मधील नागरिकांच्या सामाजिक, सांस्कृतिक व सार्वजनिक सोयीसुविधांचा विचार करून समाज मंदिरासाठी मोकळी जागा उपलब्ध करून देणे तसेच भवानी चौकाचे सुशोभीकरण तातडीने करण्यात यावे, अशी मागणी नगर परिषद प्रशासनाकडे नगरसेविका रोहिणी बालाजी मैलागिरे व नगरसेविका शोभा दिगंबर कडलवार यांनी संयुक्तरित्या लेखी निवेदनाद्वारे केली आहे.
दि. ०२ फेब्रुवारी २०२६ रोजी सादर करण्यात आलेल्या निवेदनात प्रभाग क्र. १ मधील गट क्र. १४ तसेच प्रभाग क्र. २ मधील गट क्र. ४३ येथील नगर परिषदेच्या मंजूर लेआउटमधील मोकळी जागा समाज मंदिरासाठी उपलब्ध करून देण्याची मागणी करण्यात आली आहे. या ठिकाणी समाज मंदिर उभारल्यास विविध सामाजिक, सांस्कृतिक कार्यक्रम, बैठका व सार्वजनिक उपक्रमांसाठी नागरिकांना हक्काची जागा उपलब्ध होणार असून परिसरातील एकात्मता वाढण्यास मदत होईल, असे निवेदनात नमूद करण्यात आले आहे.
तसेच प्रभाग क्र. १ मधील भवानी चौक हा परिसरातील महत्त्वाचा वर्दळीचा भाग असल्याने तेथे सुशोभीकरणाचे काम तातडीने सुरू करून स्वच्छता, सौंदर्यीकरण व सुरक्षित वातावरण निर्माण करावे, अशीही मागणी करण्यात आली आहे.
या मागण्यांमुळे परिसरातील नागरिकांच्या दैनंदिन गरजा पूर्ण होऊन प्रभागाच्या सर्वांगीण विकासाला चालना मिळेल, असा विश्वास दोन्ही नगरसेविकांनी व्यक्त केला असून त्यांच्या स्वाक्षरीसह निवेदन सादर करण्यात आले आहे.