परभणी प्रतिनिधी दि.१० :- ज्येष्ठ नागरिकांसाठी शासनामार्फत राबविण्यात येणाऱ्या विविध योजनांचा लाभ गरजूंपर्यंत पोहोचण्यासाठी ज्येष्ठांचे जनजागरण होणे अत्यंत आवश्यक आहे, असे प्रतिपादन समाज कल्याण विभागाचे सहाय्यक आयुक्त राजू एडके यांनी केले. महाराष्ट्र ज्येष्ठ नागरिक महासंघ, दक्षिण मराठवाडा प्रादेशिक विभाग यांच्यावतीने परभणी येथे आयोजित एकदिवशीय कार्यकर्ता प्रशिक्षण शिबिराच्या उद्घाटनप्रसंगी ते बोलत होते.
यावेळी त्यांनी ज्येष्ठ नागरिक कायदा 2007, वृद्धाश्रम, तीर्थदर्शन योजना, वयोश्री योजना, संजय गांधी निराधार योजना, श्रावण बाळ सेवा योजना, अमृत ज्येष्ठ योजना, अटल पेन्शन योजना आदी विविध योजनांची माहिती देत या योजनांचा लाभ मिळण्यासाठी जनजागरणाची गरज अधोरेखित केली.
कार्यक्रमाच्या अध्यक्षस्थानी महाराष्ट्र ज्येष्ठ नागरिक महासंघाचे उपाध्यक्ष अशोक तेरकर होते. त्यांनी ग्रामीण भागातील ज्येष्ठ नागरिकांविषयी विशेष चिंता व्यक्त करत, ज्येष्ठांना सन्मानपूर्वक जीवन जगण्याचा अधिकार मिळावा यासाठी ग्रामीण भागातील ज्येष्ठांनी संघटित होऊन महाराष्ट्र ज्येष्ठ नागरिक महासंघाच्या सामाजिक व राजनैतिक लढ्यात सहभागी व्हावे, असे आवाहन केले. तसेच या शिबिरात फेसकॉम व ज्येष्ठ नागरिक संघटनेबाबत माहिती दिली.
यावेळी फेसकॉमचे सचिव चंद्रकांत महामुनी यांनी ज्येष्ठ संघाचे डिजिटल व्यवस्थापन या विषयावर सविस्तर मार्गदर्शन केले. बीड जिल्हा ज्येष्ठ नागरिक समन्वय समितीचे अध्यक्ष जगन्नाथ मामडगे यांनी नवीन ज्येष्ठ नागरिक संघाची आवश्यकता व स्थापनेची पद्धत स्पष्ट केली. शिबिराच्या द्वितीय सत्रात मानसतज्ज्ञ डॉ. माणिक लिंगायत यांनी ज्येष्ठांचे मानसिक आरोग्य संतुलित ठेवण्याचे महत्त्व व आवश्यक काळजी याबाबत मार्गदर्शन केले.
परभणी येथील विधिज्ञ ॲड. माधवी शहाणे यांनी आई-वडील व ज्येष्ठ नागरिकांच्या चरितार्थ व कल्याणासाठी असलेल्या कायद्या 2007 मधील तरतुदी विशद केल्या. तर फेसकॉमच्या महिला प्रमुख डॉ. मेजर निर्मला भोसकर यांनी ज्येष्ठ महिला संघटनेची आवश्यकता, ज्येष्ठ महिलांच्या समस्या व त्यावरील उपाय यावर मार्गदर्शन केले.
शिवाजी महाविद्यालयाच्या सभागृहात झालेल्या या शिबिराची सुरुवात छत्रपती शिवाजी महाराज व ज्येष्ठ संघाचे संस्थापक डॉ. राधाकृष्ण भट यांच्या प्रतिमापूजन व दीपप्रज्वलनाने झाली. प्रास्ताविक डॉ. दामोदर थोरात, संचालन जगदीश जाजू यांनी केले, तर प्रभाकर कापसे यांनी आभार मानले. कार्यक्रमाच्या यशस्वीतेसाठी प्रकल्प प्रमुख विजया कातकडे, रोहिणी हालगे, प्रताप देशमुख, शिवाजी शिंदे, बालासाहेब आगळे, कोंडीबा राऊत व आयोध्या बोगाट यांनी परिश्रम घेतले. या एकदिवशीय कार्यकर्ता प्रशिक्षण शिबिरास धाराशिव, बीड, परभणी व लातूर जिल्ह्यातील ज्येष्ठ नागरिक संघाचे महिला व पुरुष प्रतिनिधी मोठ्या संख्येने उपस्थित होते.