नांदेड प्रतिनिधी, दि.१६ :- शहरातील सर्वांच्या उत्सुकतेचा विषय ठरलेल्या २१ व २२ फेब्रुवारी ला होणारा नरेंद्र–देवेंद्र महोत्सवाच्या तयारीला आता अधिकृत सुरुवात झाली असून कै. चंद्रभागा केरबा गंजेवार नगरी, नवा मोंढा मैदान, नांदेड येथे व्यासपीठ उभारणी व बैठक व्यवस्थेच्या कामाचा या कामाचा शुभारंभ भाजपा महानगराध्यक्ष अमरनाथ राजूरकर यांच्या हस्ते करण्यात आला.पंचवीस हजार पेक्षा जास्त रसिक उपस्थित राहतील असा विश्वास स्वागताध्यक्ष शिवप्रसाद राठी व महोत्सवाचे संयोजक धर्मभूषण ॲड. दिलीप ठाकूर यांनी व्यक्त केला.
यावेळी प्रवीण साले,मिलिंद देशमुख, किशोर भवरे, आशिष नेरळकर, विजय येवणकर, शीतल खांडील,विजय गंभीरे, अनुसूचित जाती मोर्चा अध्यक्ष जनार्दन गुपिले सर,उपाध्यक्ष बागड्या यादव, रामजी भानुशाली, सतीश बेरूळकर यांचा शिवप्रसाद राठी यांनी सत्कार केला. सूत्रसंचालन सरचिटणीस शीतल खांडील यांनी केले. यावेळी बोलताना भाजपा महानगराध्यक्ष अमरनाथ राजूरकर यांनी असे सांगितले की, “कुबेरनगरी प्रस्तुत नरेंद्र–देवेंद्र महोत्सव हा केवळ सांस्कृतिक कार्यक्रम नसून शहरातील सामाजिक, शैक्षणिक व विविध क्षेत्रातील घटकांना एकत्र आणणारा उत्सव आहे. प्रत्येक नागरिकाला अभिमान वाटेल असा भव्य आणि शिस्तबद्ध कार्यक्रम साकार करण्यासाठी नेहमीप्रमाणे नांदेडकरांनी हजारोच्या संख्येने उपस्थित रहावे,” असे आवाहन त्यांनी केले.
कार्यक्रम स्थळी येणाऱ्या हजारो नागरिकांच्या दृष्टीने भव्य व सुरक्षित व्यवस्था उभारणे अत्यंत महत्त्वाचे मानले जात आहे. याच पार्श्वभूमीवर प्रशस्त व्यासपीठ, आकर्षक सजावट, मजबूत ध्वनीव्यवस्था, प्रकाशयोजना तसेच सुव्यवस्थित बैठक व्यवस्था यासाठी नियोजनबद्ध पद्धतीने काम सुरू करण्यात आले आहे.विशेष म्हणजे ज्येष्ठ नागरिक, महिला व पत्रकार बांधवांसाठी तसेच व्हिआयपी पास धारकांसाठी स्वतंत्र व सोयीस्कर बैठक व्यवस्था करण्यात येणार आहे. कार्यक्रम सुरळीत पार पडावा यासाठी स्वयंसेवकांची नियुक्ती, वाहतूक नियोजन, पिण्याच्या पाण्याची व्यवस्था तसेच सुरक्षेच्या दृष्टीने आवश्यक उपाययोजना केल्या जात आहेत.वेळेवर उपस्थित राहणाऱ्या रसिकांना भाजपा कामगार आघाडीचे जिल्हाध्यक्ष सुरेश लोट यांच्या तर्फे १० कलर टीव्ही मोफत देण्यात येणार आहेत.
शनिवार दि. २१ फेब्रुवारी रोजी चौदावा मराठी हास्य दरबार आयोजित करण्यात आला आहे. या हास्य दरबारात स्टँडअप कॉमेडीचे बादशहा बंडा जोशी, झी हास्य सम्राट मधील लोकप्रिय कलाकार सिद्धार्थ खिल्लारे तसेच शाहीर रमेश गिरी हे आपल्या विनोदी शैलीतून रसिकांचे भरभरून मनोरंजन करणार आहेत.तसेच चला हवा येऊ दे फेम सतीश कासेवार यांचा खास महिलांसाठी “होम मिनिस्टर – खेळ पैठणीचा” हा विशेष कार्यक्रम आयोजित करण्यात आला आहे. या कार्यक्रमात लालपोतू कलेक्शन तर्फे २५ पैठणी व ऑरगंज्या साडया महिलांना मोफत देण्यात येणार आहेत.या दिवशी रमेश पारसेवार, ॲड. गजानन पिंपरखेडे, रत्नाकर वाघमारे व गंगाप्रसाद तोष्णीवाल यांना “नांदेड भूषण” पुरस्कार देऊन गौरविण्यात येणार आहे. तसेच “सुधाकर पत्रभूषण” पुरस्काराने पन्नालाल शर्मा, अभय कुळकजाईकर, चारुदत्त चौधरी, संतोष पांडागळे व रामेश्वर काकडे यांचा सन्मान करण्यात येणार आहे.
दुसऱ्या दिवशी २२ फेब्रुवारी रोजी चोवीसावे अखिल भारतीय विराट कविसंमेलन पार पडणार आहे. या कविसंमेलनात मेरठ (उ.प्र.) येथील हास्य संचालक व क्रांती कवी सौरभ जैन सुमन, जबलपूर (म.प्र.) येथील हास्य गीतकार सुदीप भोला, भिलवाडा (राजस्थान) येथील व्यंग्य कवी दीपक पारेख, मैनपुरी (उ.प्र.) येथील वीर रस कवी डॉ. मनोज चौहान, सुरत (गुजरात) येथील शृंगार रस कवयित्री सोनल जैन तसेच दिल्लीच्या वीर रस कवयित्री नेहा शर्मा ‘नमन’ यांचा सहभाग असणार आहे.याच कार्यक्रमात माजी मुख्यमंत्री अशोकराव चव्हाण यांना “नांदेड भूषण” पुरस्काराने सन्मानित करण्यात येणार आहे.
कार्यक्रम यशस्वी करण्यासाठी सुरेश लोट, कामाजी सरोदे, सुरेश शर्मा, राजेशसिंह ठाकूर, संतोष भारती, प्रज्वल कांडलकर, संतोष शिंदे, श्रीनिवास अण्णा, महेंद्र शिंदे, गजानन कापसे, प्रभुदास वाडेकर,बलराम मुदिराज पेंटर हे परिश्रम घेत आहेत.