वाहतूक सेवा समिती महाराष्ट्र राज्य अध्यक्षपदी रवी नाईक यांची नियुक्ती ; राष्ट्रीय पुरोगामी पत्रकार संघ रायगड जिल्हा बैठक उत्साहात संपन्न.
पनवेल प्रतिनिधी :- राष्ट्रीय पुरोगामी पत्रकार संघ रायगड जिल्ह्याची महत्त्वपूर्ण बैठक आज पनवेल येथील शासकीय विश्रामगृह येथे संघटनेचे संस्थापक अध्यक्ष विजय सूर्यवंशी यांच्या प्रमुख उपस्थितीत उत्साहपूर्ण वातावरणात संपन्न झाली. संघटनेच्या आगामी कार्यक्रमांचे नियोजन, संघटनात्मक मजबुतीकरण, जबाबदाऱ्यांचे वाटप तसेच संघटना विस्तारासंदर्भातील विविध विषयांवर यावेळी सविस्तर चर्चा करण्यात आली.
बैठकीच्या सुरुवातीला उपस्थित सर्व पदाधिकारी, प्रतिनिधी व कार्यकर्त्यांनी आपला परिचय देत संघटनेप्रती असलेली निष्ठा व्यक्त केली. उपस्थितांचे स्वागत रायगड जिल्हा सल्लागार राजू वारणसे यांनी शब्दसुमनांनी केले तर कार्यक्रमाचे सूत्रसंचालनही त्यांनीच केले.
यावेळी बैठकीतील प्रमुख आकर्षण ठरले ते म्हणजे राष्ट्रीय पुरोगामी पत्रकार संघ संचालित “वाहतूक सेवा समिती महाराष्ट्र राज्य” अध्यक्षपदी रवी नाईक यांची करण्यात आलेली नियुक्ती. त्यांना नियुक्तीपत्र व पुष्पगुच्छ देऊन सन्मानित करण्यात आले.
रायगड जिल्हा सचिव राजपाल शेगोकार यांनी भावना व्यक्त करताना सांगितले की, “वाहन चालक-मालक संघटना असो किंवा सर्वसामान्य वाहन चालकांवर अन्याय झाला तर रवी नाईक साहेब तत्काळ धावून येतात. पोलिस प्रशासनाशी संबंधित प्रश्न असोत किंवा चालकांच्या अडचणी, ते नेहमीच न्याय मिळवून देण्यासाठी लढत असतात. असे डॅशिंग आणि संघर्षशील नेतृत्व संघटनेला लाभणे ही अभिमानाची बाब आहे.”
नियुक्तीनंतर मनोगत व्यक्त करताना रवी नाईक म्हणाले, “गेल्या अनेक वर्षांपासून मी राष्ट्रीय पुरोगामी पत्रकार संघाचे कार्य जवळून पाहत आलो आहे. संघटनेसोबत काम करण्याची माझी इच्छा होती आणि आज तो योग जुळून आला. महाराष्ट्रातील रिक्षा चालक, वाहन चालक आणि सर्वसामान्य चालकांना न्याय मिळवून देण्यासाठी मी शंभर टक्के प्रयत्न करेन. संघटनेचे सर्व नियम, अटी व शिस्त मला मान्य असून संस्थापक अध्यक्ष विजय सूर्यवंशी यांचे नाव उंचावण्यासाठी निष्ठेने कार्य करेन.”
बैठकीच्या शेवटी संस्थापक अध्यक्ष विजय सूर्यवंशी यांनी संघटनेचा सविस्तर लेखाजोखा मांडला. त्यांनी सांगितले की, राष्ट्रीय पुरोगामी पत्रकार संघ आज महाराष्ट्रासह चार राज्यांमध्ये कार्यरत असून संघटना शेवटच्या घटकापर्यंत पोहोचली आहे. “रवी नाईक यांच्यासारखे प्रामाणिक आणि निष्ठावान नेतृत्व संघटनेत सहभागी झाल्यामुळे संघटनेची ताकद अधिक वाढेल. ते निश्चितच महाराष्ट्रातील प्रत्येक वाहन चालकाला न्याय मिळवून देण्यासाठी प्रभावीपणे कार्य करतील,” असा विश्वास त्यांनी व्यक्त केला.
यावेळी येत्या २ जून रोजी संस्थापक अध्यक्ष विजय सूर्यवंशी यांच्या वाढदिवसानिमित्त संपूर्ण महाराष्ट्रभर वृक्षारोपण अभियान राबविण्याचे आवाहन करण्यात आले. तसेच त्याच दिवशी संघटनेतील अनेक वरिष्ठ पदाधिकाऱ्यांचे वाढदिवस देखील पनवेल येथील शासकीय विश्रामगृह येथे उत्साहात साजरे करण्यात येणार असल्याची माहिती देण्यात आली.
या बैठकीस रायगड जिल्हाध्यक्ष धनाजी पुदाले, रायगड जिल्हा सचिव राजपाल शेगोकार, रायगड जिल्हा सल्लागार राजू वारणसे, रायगड जिल्हा उपाध्यक्ष दत्तू ठोके, रायगड जिल्हा संघटक उमाजी मंडले, खालापूर तालुका अध्यक्ष बालाराम सावंत, उरण तालुका उपाध्यक्ष निर्णय पाटील, मंगेश कुठले, महेश वर्तक, उरण तालुका अध्यक्ष पोलीस मित्र समिती, पनवेल उपाध्यक्ष गणेश जाधव, रविंद्र कोरडे (सचिव – वंदे मातरम संघटना), के. सी. पाटील सर (जिल्हाध्यक्ष – शिक्षक कर्मचारी संघटना), मधुकर उरणकर (SC संघटना, पनवेल शहर) यांच्यासह अनेक पदाधिकारी, प्रतिनिधी व कार्यकर्ते मोठ्या संख्येने उपस्थित होते.
बैठकीत उपस्थित सर्वांनी संघटनेच्या वाढीसाठी आणि पत्रकार तसेच वाहन चालकांच्या हक्कांसाठी एकदिलाने कार्य करण्याचा निर्धार व्यक्त केला.